شاريعات ۇكىمىن زاڭعا ەنگىزگەن برۋنەي بۇۇ-نىڭ ايىپتاۋىنا ۇشىرادى

برۋنەيدە شاريعاتقا نەگىزدەگەن زاڭ كەشەدەن باستاپ رەسمي اتقارىلۋعا بەرىلدى. جاڭا زاڭ بويىنشا ءبىر-ءبىرىنىڭ كوزىنە ءشوپ سالعان جۇبايلار جانە گوموسەكسۋالدىق بايلانىستارعا بارعاندار شاريعاتقا ۇقساس ءولىم جازاسى بەرىلسە، ۇرلىق ىستەگەندەردىڭ قولى شابىلماق. الايدا، بۇل قۇقىقتىق رەفورما بۇۇ مەن بىرقاتار باتىس ەلدەرىنىڭ ايىپتاۋىنا ۇشىرادى. 

برۋنەي شاريعاتقا ساي زاڭ شىعارعان وڭتۇستىك شىعىس ازياداعى العاشقى ەل بولىپ قالدى. ءتىپتى، كەيبىر ەلدەردىڭ باسىلىمدارى برۋنەيدى «ازيالىق ساۋد ارابيا» دەپ اتاي باستاعان. بىرىككەن ۇلتتار ۇيىمى برۋنەيدى بۇل رەفورمانى وزگەرتۋگە شاقىردى. ەگەر زاڭ ءوز كۇشىندە قالسا، وندا بۇۇ تارابى برۋنەيلىك كومپانيالارعا شەكتەۋ جاريالاماق.

نەگىزى، بۇنداي زاڭ اتالعان ەلدە 2014 جىلى قابىلدانا باستاعان. بىراق، رەسمي اتقارۋعا بەرۋدى كەشىكتىرىپ كەلگەن. ونى جاساۋشى جانە قولداۋشىسى سول ەلدىڭ باسشىسى – سۇلتان حاسسانال بولكياح. برۋنەيدىڭ بۇل زاڭدىق رەفورماسىن باتىستىق تانىمال تۇلعالار ايىپتاپ شىقتى. ولار ءوز ەلدەرىن برۋنەيمەن ديپلوماتيالىق قارىم-قاتىناستى ۇزۋگە شاقىرۋدا. ولاردىڭ اراسىندا الەمگە تانىمال كينو مەن ەسترادا جۇلدىزدارى كوبىرەك.

بۇل زاڭنىڭ اتقارىلۋىنا كوبىرەك كۇش سالعان برۋنەي باسشىسى سۇلتان حاسسانال بولكياح – الەمدەگى ەڭ باي ادامداردىڭ ءبىرى. ونىڭ جۇزەگە اسىرعان زاڭى بويىنشا ءبىر-ءبىرىنىڭ كوزىنە ءشوپ سالعان جۇبايلار نەمەسە گوموسەكسۋالدىق قاتىناستارعا بارعانداردى ءولىم جازاسى كۇتىپ تۇر. جەڭىلدەتىلگەن كۇننىڭ وزىندە زىندانعا تاستالادى نەمەسە اياعى شابىلادى. ۇرلىق جاساۋشىنىڭ قولى كەسىلەدى. كەز-كەلگەن قىلمىس كۇماندىسىنە ايىپ تاعۋ ءۇشىن كەمىندە ءتورت مۇسىلمان كۋالىك ەتۋى شارت. بۇل ەلدە گوموسەكسۋاليزم بۇعان دەيىن دە زاڭ بۇزۋ ەسەپتەلگەن. الايدا، تەك اباقتىعا قاماۋ جازاسىن بەرىپ كەلگەن.

“The Qazaq Times”