فوتو: http://ibirzha.kz

قازاقستان ازاماتتارى جەكە كۋالىكتەگى جەكە ساقتاندىرۋ ءنومىرىنىڭ دۇرىس ەمەستىگىن ايتىپ، بىرنەشە مارتە شاعىمدانعان.

اتالعان ماسەلەنى شەشۋ ءۇشىن قر پارلامەنتى ءماجىلىسىنىڭ دەپۋتاتتارى جەكە ساقتاندىرۋ نومىرلەرىن تۇزەتۋ تۋرالى زاڭعا قول قويدى. كۋالىكتەردىڭ نەلىكتەن قاتە جازىلعاندىعى جايلى دەپۋتات شاكىر حاحازوۆ: «زاڭ مەن نورماتيۆتىك اكتىلەردە جسن-نى تۇزەتۋگە قاتىستى ەشقانداي ەرەجە جوق. وسىنداي جاعدايدىڭ بولماۋى حالىققا قىزمەت كورسەتۋ ورتالىقتارىنىڭ قىزمەتكەرلەرى تاراپىنان ءوتىنىش بەرگەن كەزدە رەسمي تۇردە باس تارتۋعا نەگىز بولادى. جسن-نى يەلەنۋدەگى قاتەلىكتىڭ سالدارىنان ادامدار جىلدار بويى جاسىن، ءتىپتى جىنىسىن دالەلدەۋگە تىرىسادى. سول سەبەپتى ماسەلە دەر كەزىندە قولعا الىنۋى ءتيىس»، – دەدى.

باق-تا سالىق قىزمەتى، بانكتەر مەن وزگە دە ۇيىم، مەكەمەلەر تاراپىنان تولەم قابىلداۋدان جانە كەيبىر مەملەكەتتىك قىزمەتتەردى كورسەتۋدەن باس تارتىپ وتىرعانى تۋرالى اقپارات تارادى. مۇنىڭ باستى سەبەبى اقپارات قۇرالدارىنىڭ حابارلاۋىنشا، جسن-دەگى مالىمەتتەر ادامنىڭ تۋعان كۇنىمەن، نەمەسە تۋعان جىلىمەن كەيبىرەۋىندە ءتىپتى جىنىسىمەن سايكەس كەلمەيدى. جەكە ساقتاندىرۋ نومىرلەرىندە كەتكەن قاتەلىك ءاربىر ازامات ءۇشىن ۇلكەن قيىندىققا اكەپ سوعادى. ماسەلەن، كاسىپكەر بيزنەسى قۇردىمعا كەتۋى ءمۇمىن. سەبەبى كاسىپ يەسى مەملەكەتتىك ساتىپ الۋعا قاتىسا المايدى. بۇدان بولەك، وسى ۋاقىتقا دەيىن سالىقتى، زەينەتاقى جارنالارىن جانە كوممۋنالدىق تولەمدەردى ۋاقىتىلى تولەگەن ازامات ءوزىنىڭ قايتىس بولعاندىعى جايلى اقپارات العان. ەلەكتروندى ۇكىمەت جۇيەسىندە ەر ادام رەتىندە تىركەلگەن ايەلدەر دە بار. وسى سىندى ءبىر عانا تسيفردان كەتكەن ورەسكەل قاتەلەر ءورىپ ءجۇر.

جۋىردا وسى ماسەلەگە قاتىستى قر ءىىم-ءنىڭ ميگراتسيالىق قىزمەت كوميتەتى بۇقارالىق اقپارات قۇرالدارىندا مەكەمەلەر مەن قىزمەت كورسەتۋ ورىندارىنىڭ جەكە سايكەستەندىرۋ نومىرىندەگى (جسن) قاتەلىككە بايلانىستى تولەم قابىلداۋدان باس تارتۋ ماسەلەسىنە قاتىستى جاعدايدى ءتۇسىندىردى. ءىىم تاراتقان حابارلامادا: «ءبىز ءوز تاراپىمىزدان مۇنداي ارەكەتتەردى زاڭسىز دەر ەدىك. جسن تۋ تۋرالى كۋالىك بەرىلگەن كەزدە اۆتوماتتى تۇردە قالىپتاسادى (2009 جىلعا دەيىن ول جەكە قۇجاتتى نەمەسە جەكە كۋالىكتى دايىنداعان كەزدە قالىپتاساتىن) جانە ول وزگەرمەۋ، تەڭدەسسىزدىك پريتسيپتەرىنە نەگىزدەلەدى»، – دەلىنگەن. ەندى بانكتەر قولداناتىن كومپيۋتەرلىك باعدارلامالاردا جسن-ءدى تەكسەرۋ الگوريتمى قايتا جاسالادى جانە ول ازاماتتاردىڭ جەكە مالىمەتتەرىمەن بايلانىستىرىلعان.

"The Qazaq Times"