يران قازاقستان تاۋارلارىنا باج سالىعىن تومەندەتپەك

يران قازاقستاننان جەتكىزىلەتىن 864 تاۋارعا يمپورتتىق باج سالىعىن تومەندەتەدى. بۇل تۋرالى قر ۇلتتىق ەكونوميكا ۆيتسە-ءمينيسترى سەرىك جۇمانعارين مالىمدەدى.

ەاەو-عا مۇشە ەلدەر 502, ونىڭ ىشىندە 126 اۋىل شارۋاشىلىعى، 376 ونەركاسىپتىك تاۋار بويىنشا يمپورتتىق باج ستاۆكالارىن تومەندەتكەن. سىعان بايلانىستى قر سەناتى ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا ۆيتسە-مينيستر: «2018 جىلى 17 مامىردا استانادا ەاەو-عا مۇشە مەملەكەتتەر مەن يران يسلام رەسپۋبليكاسى اراسىنداعى ەركىن ساۋدا ايماعىن قۇرۋعا الىپ كەلەتىن ۋاقىتشا كەلىسىمگە قول قويىلعان بولاتىن. كەلىسىمگە سايكەس، كەلىسسوزدەردى جۇرگىزۋ جايلى شەشىمدى ەاەو مەملەكەتتەرىنىڭ باسشىلارى 2016 جىلى قابىلداعان. وسى رەتتە يرانمەن ەركىن ساۋدا ايماعىن قۇرۋ باستاماسىن مەملەكەت باسشىسى 2014 جىلى كاسپي ماڭى مەملەكەتتەرى باسشىلارىنىڭ سامميتىندە ۇسىندى. بۇل كەلىسىمدى ىسكە اسىرۋ وتاندىق تاۋارلاردى 80 ملن-نان استام حالقى بار يراننىڭ پەرسپەكتيۆالى نارىعىنا شىعارۋ ارقىلى ولاردىڭ ەكسپورتىن ۇلعايتۋعا مۇمكىندىك بەرەدى. جالپى العاندا وسىنداي كەلىسىم ەكسپورتتى الەمدىك نارىققا شىعارۋ قۇرالدارىنىڭ ءبىرى بولىپ سانالادى»، – دەپ مالىمدەدى.

سەنات قاراۋىنا تۇسكەن بۇل كەلىسىمگە سايكەس، يران تاراپى 864, ونىڭ ىشىندە 262 اۋىل شارۋاشىلىعى، 602 ونەركاسىپتىك تاۋارعا قاتىستى يمپورتتىق باج ستاۆكالارىن تومەندەتەدى. يران نارىعىنا سيىر جانە قوي ەتتى جەتكىزۋ ستاۆكاسى 26-دان 5-10, بۇرشاق داقىلدارى 55-تەن 5-10, وسىمدىك مايىن 20-دان 10, ماكارون جانە كونديتەرلىك ونىمدەردى 55-تەن 14-20, بولات يلەك 20-دان 15, رەلستەر 5-4%-عا دەيىن تومەندەتىلەدى. اتالعان تاۋارلار قازاقستاننىڭ يرانعا ەكسپورتىنىڭ 292 ملن دوللارىنا جۋىق ياعني 54%-دان استام.

ايتا كەتەيىك، قازاقستان مەن يراننىڭ ءوزارا ساۋدا كولەمى 2018 جىلى 516,3 ملن اقش دوللار. ونىڭ ىشىندە يرانعا ەكسپورت 426,7 ملن، يمپورت 89,5 ملن دوللاردى قۇرادى. قازاقستاننىڭ نەگىزگى  تاۋارلارىنىڭ ىشىندە ارپا 272 ملن، بولات يلەك 87 ملن، راپس تۇقىمى 17 ملن جانە قوي ەتى 11,6 ملن دوللارعا جەتكىزىلگەن.

"The Qazaq Times"