ريم پاپاسىنىڭ مالىمدەمەسى ەۆرەيلەردى قۋانتتى

ريم پاپاسى فرانتسيسك ۆاتيكاننىڭ قۇپيا مۇراعاتى 2020 جىلى حالىققا اشىق بولاتىنىن مالىمدەدى. وندا دۇنيەجۇزىلىك ەكىنشى سوعىس كەزىندەگى كوپتەگەن دەرەكتەر ساقتالعاندىقتان، ەۆرەيلەر ۆاتيكان مۇراعاتىنىڭ اشىلۋىن كوپتەن كۇتكەن بولاتىن.

كاتوليكتەردىڭ رۋحاني كوسەمى پاپا فرانتسيسك مالىمدەمەسىندە، قۇپيا مۇراعاتتىڭ پي XII كەزەڭى جۇرتقا قولجەتىمدى بولاتىنىن ايتتى. پاپا پي XII 1939 جىلى 2 ناۋرىزدان 1958 جىلى 9 قازانعا دەيىن ۆاتيكاننىڭ ءدىني كوسەمى بولعان. ەۆرەي حالقى سول كەزدەگى ريم پاپاسىنىڭ ەۆرەيلەرگە باعىتتالعان قىرعىنعا كوز جۇما قارادى دەپ ايىپتايدى.

بىراق، «شىركەۋ تاريحتان قورىقپايدى»، – دەگەن پاپا فرانتسيسك سول كەزەڭدەگى قۇپيا مۇراعاتتار 2020 جىلى 2 ناۋرىزدان باستاپ حالىققا قولجەتىمدى بولاتىنىن مالىمدەدى.

ايتا كەتۋ كەرەك، دۇنيەجۇزىلىك ەۆرەيلەر كوميتەتى اتالعان مۇراعاتتىڭ اشىلۋىن 30 جىلدان بەرى تالاپ ەتىپ كەلە جاتقان بولاتىن. XX عاسىردىڭ قاندى تاڭبالارىنان تىس، ۆاتيكاننىڭ قۇپيا مۇراعاتى سيونيزم مەن حريستيان جۇرتى اراسىنداعى كەيبىر تالاس-تارتىستار ءۇشىن دە ماڭىزدى.

“The Qazaq Times”