پرەزيدەنت ساليح اۋەجايدان اتتاندىرىپ سالدى. فوتو: VOA.

ريم پاپاسى فرانتسيسك يراكتاعى ءتورت كۇندىك ساپارىن 8 ناۋرىز دۇيسەندى كۇنى اياقتاپ، ۋاتيكانعا (ۆاتيكان) قايتتى. ول حالقىنىڭ باسىم كوبى شيىتتەردەن تۇراتىن يراكتاعى ساپارىندا حريستيان مەن مۇسىلمانداردىڭ بەيبىت قاتار ءومىر ءسۇرۋىدى ۋاعىزدادى.

پاپا فرانتسيس ءتورت كۇن بويى يراكتاعى جوعارى دارەجەلى ۇكىمەتتىك جانە ءدىني جەتەكشىلەرمەن كەزدەستى. ال، كەتەرىندە ەل پرەزيدەنتى بارحام ساليح باعداد اۋەجايىنان قولتىعىنان دەمەپ اتتاندىرىپ سالدى.

ريم پاپاسىنىڭ يراك ساپارىنداعى ەڭ ەلەۋلى ارەكەتىنىڭ ءبىرى موسۋل قالاسىنا بارۋى بولدى. وسىدان ءبىراز جىل بۇرىن عانا اتالعان قالادا وزدەرىن «يسلام مەملەكەتى» دەپ اتالعان ءدىني ەكسترەميستىك توپ حاليفات جاريالاعان ەدى. ۋاتيكان باسشىسى وسى قالانىڭ ورتالىق الاڭىندا قۇربان بولعان تۇرعىنداردىڭ ارۋاعىنا باعىشتاپ دۇعا وقىدى. ارينە، كاتوليكتەردىڭ رۋحاني ليدەرى يراكتاعى حريستياندىق قالالاردى دا قاعىس قالدىرماي ارالاپ كەتتى.

سەنبىدە 84 جاستاعى ريم پاپاسى نادجافتا 90 جاستاعى يراك شيتتەرىنىڭ جەتەكشىسى اياتوللا الي سيستانيمەن كەزدەسكەن. كەزدەسۋ اياتوللانىڭ قاراپايىم ۇيىندە وتكەن.  سيستاني يراكتا عانا ەمەس، وزگە ەلدەردەگى شيىتتەر اراسىندا ۇلكەن ىقپالعا يە ءدىني جەتەكشى.

جەكسەنبىدە، پاپا فرانتسيسك يراكتىڭ كۇردىستان اۆتونوميالىق ايماعىنداعى ەڭ ۇلكەن قالاسى – ەربيلدەگى حاريري ستاديونىندا اشىق اسپان استىنداعى جەكسەنبىلىك ءدىني ءراسىمدى باسقاردى. كارانتين شەكتەۋلەرىنە قاراماستان وندا 10 مىڭعا جۋىق ادام جينالدى.

بۇل پاپا فرانتسيسكتىڭ شيىتتەر كوبىرەك تۇراتىن مۇسىلمان ەلىنە العاش رەت ساپارمەن بارۋى. ونىڭ ساپارى يراك پەن يران جانە جالپى ورتا شىعىستاعى قازىرگى ساياسي ماسەلەلەرگە دە قاتىستى.

“The Qazaq Times”