ەلباسى نۇرسۇلتان نازارباەۆ. فوتو: BNews.kz

ەلباسى نۇرسۇلتان نازارباەۆ اكىمدەردىڭ جۇمىسىنا قاناعاتتانبايتىندىعىن ايتىپ، ولاردى حالىققا جاقىن بولۋعا شاقىردى. سول سەكىلدى پوپۋليزمنەن الىس بولۋى كەرەك ەكەندىگىن ەسكەرتتى.

"بىزدە ايماقتاردىڭ دامۋىنىڭ ايىرماشىلىعى كورىنىپ تۇر. نەلىكتەن ءبىر وبلىستاردا جولدىڭ ساپاسى باسقا وبلىستاردان جاقسى؟ نەلىكتەن تۇرعىن ءۇي-كوممۋنالدىق شارۋاشىلىعى ءبىر جەرلەردە تۇراقتى جۇمىس ىستەيدى، ال كەيبىرى تۇراقسىز؟ وسىعان وراي كەيبىر اكىمدەر شىنىمەن جۇمىس ىستەپ، حالىقتىڭ ماسەلەلەرىن شەشەدى، باسقالارى ولارمەن سويلەسۋدەن قاشىپ، ادامداردىڭ تالاپ-تىلەكتەرىنە قۇلاق اسپايدى. اكىمدەرگە حالىققا جاقىن بولۋ كەرەك جانە ولاردىڭ حال-احۋالىن جاقسارتۋى ءتيىس", - دەدى نازارباەۆ "نۇر وتان" پارتياسىنىڭ XVIII سەزىندە.

سونداي-اق، جىل سايىن حالىق الدىندا ءبىر رەت ەسەپ بەرەتىن اكىمدەردىڭ ءىسىن، كوزگە كورىنۋ ءۇشىن ىستەلىپ جاتقان دۇنيە سەكىلدى ەكەندىگىن ايتتى. بۇدان بولەك، ايماقتاعى تۇرعىندارمەن كەزدەسىپ، ءاربىر تۇرعىننىڭ مۇڭ-مۇقتاجدىعىن تىڭداۋ ءۇشىن ءبىر جىل كۇتۋدىڭ قاجەتى جوق ەكەندىگىن دە مالىمدەگەن. سول سەكىلدى حالىققا جاسالعان ءارتۇرلى جوبالارعا قارجىنىڭ ءبولىنىپ جاتقاندىعىن ايتىپ، بىراق، كوپشىلىك مۇنىڭ ناتيجەسىن كورمەي جۇرگەندىگىن قوزعادى.

"بىزدە ۇكىمەت مۇشەلەرى اۋىستى. ولاردىڭ 70 پايىزى جاڭاردى. وبلىستار جايلى جاڭا ۇكىمەت مۇشەلەرىنە سۇراقتار تۋىنداپ جاتىر. اكىمدەرگە ايتىلعان تاپسىرمالاردى ىسكە اسىرۋ كەرەك. ايتىلعان ماسەلەلەردى بارلىعىمىز ءبىر اۋىزدان شەشۋىمىز قاجەت. بۇل وڭاي جۇمىس ەمەس. بىراق بۇل تاپسىرمالار وبلىس، قالا، اۋىل ايماقتارعا ارنالعان. كۇشىمىزدى بىرىكتىرىپ تاپسىرمانى ورىنداۋعا كىرىسسەك، بىزدە قيىندىقتار بولمايدى. اكىمدەر وسىدان باسقا قانداي ىستەرمەن اينالىسۋى كەرەك؟", - دەگەن نۇرسۇلتان نازارباەۆ ءاربىر وبلىستىڭ دامۋى ءتيىس ەكەندىگىن ايتتى.

الايدا، قاراپايىم تۇرعىندار جاڭا كەلگەن ۇكىمەتتەن دە قاتتى ءبىر جاڭالىق كۇتپەيتىندىگىن العا تارتۋدا. سەبەبى، بۇعان دەيىن دە بىرنەشە رەت وزگەرگەن بيلىك وكىلدەرى وزدەرىنىڭ ماردىمدى جۇمىسىمەن ەرەكشەلەنە قويماعان.

سونىمەن قاتار، اكىمدەردىڭ ەسىگى حالىق ءۇشىن ايقارا اشىق بولاتىندىعىنا دا كۇمان تۋدىرىپ وتىر. ويتكەنى، حالىقتىڭ زاڭدى تالاپتارى كوپ جاعدايلاردا تىڭدالماي كەلەدى. ەندى ەلباسىنىڭ ءسوزى بيلىك وكىلدەرىنە قانشالىقتى اسەر ەتەتىندىگى بولاشاقتىڭ ەنشىسىندە. بىراق، قاراپايىم تۇرعىندار ولاردىڭ تىڭعىلىقتى ىستەر اتقاراتىندىعىنا سەنۋدەن قالعان...

"The Qazaq Tımes"