ءۇندىستان قارۋلى كۇشتەرى 26 اقپاندا پاكىستاننىڭ كاشمير اۋماعىنا اۋە سوققىسىن جاسادى.

رەسمي مالىمەتكە قاراعاندا، ءۇندىستان قارۋلى كۇشتەرىنە تيەسىلى 12 ۇشاق "جايش-ە-مۇحامماد" (JeM, "مۇحاممەد ارمياسى"), "حيزبۋل مۋدجاحيددين" (Hizbul Mujahideen) جانە LeT سودىرلارىنىڭ لاگەرىنە سالماعى ءبىر توننا بولاتىن بومبا تاستاعان. «ANI» ءۇندى اگەنتتىگىنىڭ حابارلاۋىنشا، بالاكوت، چاكوتي جانە مۋزاففاراباد تەرروريستىك لاگەرلەردى بومبالاۋ سالدارىنان تولىق جويىلعان. "مۇحاممەد ارمياسى" باقىلاۋ بەكەتى دە تولىق جويىلعان.

"بۇل ەلدى قورعاۋ ءۇشىن ماڭىزدى قادام بولدى. پرەمەر-مينيستر نارەندرا مودي قارۋلى كۇشتەرگە ەركىن ارەكەت ەتۋگە رۇقسات بەردى", – دەپ مالىمدەدى ادام رەسۋرستارىن دامىتۋ ءمينيسترى پراكاش دجاۆادەكار.

ءۇندىستاننىڭ سىرتقى ىستەر ءمينيسترى ۆيدجاي گوكحالە «سودىرلار ءۇندىستان اۋماعىنا شابۋىل جاساماق بولدى» دەپ مالىمدەدى. ول اۋە سوققىسىنىڭ سالدارىنان تەرروريستىك توپتاردىڭ ساربازدارىمەن بىرگە باسشىلارى دا قازا تاپتى دەدى.

پاكىستان ۇكىمەتى ءۇندىستان اسكەري ۇشاقتارىنىڭ مۋزافارابادقا (كاشمير) شابۋىل جاساعانىن راستادى. بىراق سودىرلار لاگەرىنىڭ جويىلعانى، نە جويىلماعانى جونىندە ازىرگە ەشقانداي اقپارات بەرمەدى.

كاشمير ايماعى 1947 جىلدان بەرى ءۇندىستان مەن پاكىستان اراسىنداعى داۋعا سەبەپ بولىپ كەلەدى. بريتاندىق ءۇندىستان تاۋەلسىزدىك العاننان كەيىن بۇل ايماق ءدىني سەنىمگە بايلانىستى ەكىگە بولىنگەن. قازىر كاشميردە مەملەكەتتىك شەكارا جوق.

"The Qazaq Times"