ۆەنەسۋەلا ازاماتتىق سوعىستىڭ قاۋپىندە تۇر

ۆەنەسۋەلا پرەزيدەنتى نيكولاس مادۋرونىڭ حالىقارالىق گۋمانيتارلىق كومەكتەردىڭ ەلگە كىرۋىنە تىيىم سالۋى ەل شەكاراسىنا جاقىن ايماقتاردا وپپوزيتسيا مەن قارۋلى كۇشتەردىڭ قاقتىعىسىنا اپارىپ سوقتى. قاقتىعىستا ەكى ادام ولگەنى ءمالىم بولدى، ونىڭ ءبىرى 14 جاستاعى ءجاسوسپىرىم ەكەنى ايتىلۋدا. مادۋرو بۇل گۋمانيتارلىق كومەك اقش اسكەرىنىڭ ەلگە كىرۋىنە جول سالادى دەپ قارايدى.

وپپوزيتسيا جەتەكشىسى حۋان گۋايدو بولسا، حالىقارالىق قاۋىمداستىققا پرەزيدەنت مادۋرونىڭ بيلىكتەن كەتۋىن رەسمي تالقىلاۋدى ءوتىندى. بۇعان اقش تارابى ءۇن قوسىپ، مەملەكەتتىك حاتشى مايك پومپەو: «مادۋرونىڭ بيلىكتەن كەتۋىنە از ۋاقىت قالدى»، – دەدى.

وتكەن اپتا سوڭىندا حۋان گۋايدو برازيليا مەن كولۋمبيادان گۋمانيتارلىق كومەك جەتكىزۋگە ەرىكتىلەردى كومەككە شاقىرعان. الايدا، كۇشتىك قۇرىلىمدار ولاردىڭ جولىن توسقان. العاشىندا جەلىم شاشاتىن وقتار قولدانعان، كەيىن شىنايى وقتار اتقان. قۇراما شتات وپپوزيتسياعا قارسى كۇشتىك قۇرىلىمداردى قولدانۋدى ايىپتادى جانە شارا قولدانۋعا دايىن ەكەنىن دە ءبىلدىردى. بۇنداي سىندى جەكسەنبىدە ەۋروپا وداعى دا جولدادى.

وپپوزيتسيا جەتەكشىسى حالىقارالىق گۋمانيتارلىق كومەككە مۇقتاج ەكەندىكتەرىن ايتقاننان كەيىن بىرقاتار ەلدەر كومەككە ات سالىستى. اقش-تان 300 توننا كومەك جەتكىزىلەتىنى حابارلانعاننان كەيىن ۆەنەسۋەلاداعى ساياسي داعدارىس ءتىپتى كۇشەيىپ كەتتى. حالىقارالىق كومەك كولۋمبيانىڭ ۆەنەسۋەلاعا شەكاراس قالاسىنا جينالىپ، سول جەردەن تاراتىلاتىن بولعان. گۋايدو ازىق-تۇلىك، ءدارى-دارمەكتى ەلگە جەتكىزۋگە ءجۇز مىڭداعان ەرىكتىلەردى كومەككە شاقىرعان. بىراق، مادۋرو بيلىگى بىرنەشە شەكارا بەكەتىن جاۋىپ تاستاعان جانە قاراۋىلدى كۇشەيتكەن. وعان قاراماستان گۋايدو جاقتاستارىمەن كولۋمبياعا ءوتىپ حالىقارالىق گۋمانيتارلىق كومەككە جەتكەن. برازيليامەن شەكارادان دا گۋمانيتارلىق كومەكتى ەلگە كىرگىزۋشى ەرىكتىلەر مەن قارۋلى كۇشتەر اراسىندا قاقتىعىس بولعان.

تاراپ جاتقان مالىمەتتەرگە قاراعاندا، سەنبى كۇنى بولعان قاقتىعىستاردان 2 ادام ءولىپ، 300-گە جۋىق ادام جارالانعان. كەيبىر تۇرعىندار اسكەري ارەكەتتەردەن كەيىن كورشىلەس ەلدەرگە قونىس اۋدارعان.

مادۋرو كولۋمبيامەن ديپلوماتيالىق مامىلەنى ءۇزىپ، ديپلوماتتاردى 24 ساعات ىشىندە شىعىپ كەتۋىن تالاپ ەتتى. كولۋمبيا تارابى دا ديپلوماتتارىن شىعارىپ الۋعا جانە قاقتىعىس ايماقتارىنا جاقىن شەكارالارىن جابۋعا كىرىستى.

“The Qazaq Times”