فوتو: lentaua.net

ۋكراينا پرەزيدەنتى پەتر پوروشەنكو اقش پەن رەسەي بايلانىسىنا قاتىستى پىكىر ءبىلدىردى.

«پرياموي» تەلەارناسىنا سۇحبات بەرگەن پوروشەنكو ازوۆتاعى جاعدايدان كەيىن اقش-تىڭ رەسەيگە كوزقاراسىنىڭ بۇرىنعىدان السىرەپ كەتكەنىن جانە سول سەبەپتى ەكى ەل ۇيىمداستىرعان كەزدەسۋگە امەريكاندىق وكىلدىڭ قاتىسپاعاندىعىن ايتتى. سونىمەن قاتار، ۋكراينا پرەزيدەنتى رەسەيگە قارسى جاڭا سانكتسيالار ەنگىزگەن ەۋروپالىق وداق ساياساتىن جوعارى باعالادى.

پەتر پوروشەنكو: «ميۋنحەندەگى جيىندا اقش ۆيتسە-پرەزيدەنتى مايك پەنس رەسەي كەرش بۇعازىندا ۋكرايندىق تەڭىزشىلەردى قاماۋعا العاندىقتان، ءبىزدىڭ تاراپ رەسەيلىكتەر ۇيىمداستىرعان كەزدەسۋگە قاتىسۋدان باس تارتتى دەدى. دەمەك، الداعى ۋاقىتتا ەكى ەل باسشىلارىنىڭ كەزدەسۋى ەكىتالاي»، – دەدى.

وسىعان دەيىن اقش رەسەيدىڭ «اگرەسسيالىق ساياساتىنا» قارسى جاڭا رەزوليۋتسيا قابىلداعان بولاتىن. كيەۆ پەن ماسكەۋ تەكەتىرەسىنە قاكتىستى قابىلدانعان اقش سەناتىنىڭ رەزوليۋتسياسى حالىقارالىق دەڭگەيدە تانىلعان شەكارالار بويىنشا ەكى جاقتى كەلىسىمدەرگە قولداۋ كورسەتۋگە جانە كەرش بۇعازى مەن ازوۆ تەڭىزى ارقىلى كەمەلەردىڭ قاۋىپسىز ءوتۋىن قامتاماسىز ەتۋگە باعىتتالعان. سەناتورلار مۇنداي قادام «رەسەيدىڭ شامادان تىس اۋماقتىق قاقتىعىستارىنا تويتارىس بەرەدى» دەپ سانايدى. بۇعان قاتىستى سەنات كوميتەتىنىڭ توراعاسى رون دجونسون: «اقش پەن ءبىزدىڭ وداقتاستارىمىز كەرش بۇعازىنداعى رەسەيدىڭ اسكەري اگرەسسياسىنا تەز ارادا باتىل قادام جاساۋ ارقىلى جاۋاپ بەرەدى. حالىقارالىق تەڭىز وپەراتسياسىن جۇرگىزۋ قارا تەڭىزدەن ازوۆقا دەيىن قاۋىپسىزدىكتى قامتاماسىز ەتۋى ءتيىس»، – دەدى.

25 قاراشادا رەسەي كەرش بۇعازىندا ۋكراينا اسكەري-تەڭىز كۇشتەرىنىڭ ءۇش كەمەسىن باسىپ الىپ، وق اتقان. ۋكراينا پرەزيدەنتى پەتر پوروشەنكو رەسەيدىڭ بۇل ارەكەتىن «باسقىنشىلىق» دەپ اتاپ، ولاردان ازوۆ تەڭىزىندە ۇستالعان ۋكراينا اسكەري كەمەلەرى مەن تەڭىزشىلەرىن دەرەۋ بوساتۋدى تالاپ ەتتى. ال ماسكەۋ كەمەلەر قىرىمعا جاقىن تەڭىزدە رەسەي شەكاراسىن بۇزدى دەپ ايىپتادى.

"The Qazaq Times"