فوتو: Ever-Pretty

وتكەن اپتادا وزبەكستان ەكس-پرەزيدەنتى يسلام كارىموۆتىڭ ۇلكەن قىزى گۇلنارا كارىموۆانىڭ بەس جىلدىق جازاسى اياقتالدى. ەكس-حانشايىم بوستاندىققا شىعا ما؟

2015 جىلدىڭ تامىز ايىندا تاشكەنت وبلىستىق سوتى گۇلنارا كارىموۆانى ەكونوميكالىق قىلمىسى ءۇشىن بەس جىلعا باس بوستاندىعىنان ايىرعان. ەكس-پرەزيدەنت قىزىنىڭ جازاسى سوت شەشىمى بويىنشا، ونىڭ ۇستالعان ۋاقىتىنان ياعني 2014 جىلدىڭ 16 اقپانىنان باستاپ ەسەپتەلگەن. وتكەن اپتادا بۇل مەرزىم اياقتالدى. بىراق رەسمي تاشكەنت ازىرگە گۇلنارا كارىموۆاعا قاتىستى ەشقانداي مالىمدەمە جاسامادى.

2014 جىلعا دەيىن يسلام كارىموۆتىڭ مۇراگەرى سانالىپ كەلگەن گۇلنارانىڭ ساياسي مانسابى ءبىر-اق كۇندە اياقتالدى. وعان ەكس-حانشايىمنىڭ شۆەتسيالىق «TeliaSonara» كوممۋنيكاتسيالىق كومپانياسىنان پارا العاندىعى جونىندەگى اقپاراتتاردىڭ باق بەتتەرىنە شىعۋى سەبەپ بولدى. بىراق اكەسىنىڭ كوزى تىرىسىندە گۇلنارا كارىموۆا بىردەن تۇرمەگە توعىتىلعان جوق. سوت وعان «ءۇي قاماعى» جازاسىن كەستى.

2017 جىلدىڭ شىلدە ايىندا يسلام كارىموۆتىڭ ومىردەن وزعانىنا ءبىر جىل تولار تولماس ۋاقىتتا وزبەكستان باس پروكۋراتۋراسى «گۇلنارا كارىموۆا ءۇي قاماعىنان تۇرمەگە اۋىستىرىلدى» دەگەن مالىمدەمە تاراتتى جانە ونىڭ ۇستىنەن جاڭادان قىلمىستىق ءىس قوزعالعاندىعىن، كارىموۆانىڭ ەل ەكونوميكاسىنا 2 ميلليارد دوللار شىعىن الىپ كەلگەندىگىن جاريالادى. بىراق وسى ۋاقىتقا دەيىن وزبەكستان قۇزىرلى ورگاندارى جاڭادان تاعىلعان ايىپ بويىنشا، گۇلنارا كارىموۆانىڭ قاماۋ مەرزىمى ۇزارتىلعاندىعى جونىندە ەشقانداي مالىمدەمە جاسامادى.

2018 جىلدىڭ 15 اقپان كۇنى ستوكگولم اۋداندىق سوتى «گۇلنارا كارىموۆاعا پارا بەردى» دەپ ايىپتالعان «TeliaSonara» كومپانياسىنىڭ ەكس-توپ-مەنەدجەرلەرى لارس نيۋبەرگتى، تەرو كۆيسااريدى جانە وللي تەپپو ءتۋوحيمدى اقتاپ شىقتى. بۇعان دەيىن 2018 جىلدىڭ مامىر ايىندا قىلمىستىق ىستەر جونىندەگى شۆەيتساريا فەدەرالدىق سوتى ەل اۋماعىندا بۇعاتتالعان گۇلنارا كارىموۆاعا تيەسىلى 800 ميلليون شۆەيتساريا فرانكىنىڭ 686,7 ميلليونىن وزبەكستانعا قايتارىپ بەرۋ جونىنىندە ۇكىم شىعارعان.

قازىرگى تاڭدا گۇلنارا كارىموۆانىڭ قايدا ەكەندىگى بەلگىسىز. وسىدان ءبىراز ۋاقىت بۇرىن باق بەتتەرىندە «كارىموۆا ءوز جازاسىن تاشكەنت ماڭىنداعى تۇرمەلەردىڭ بىرىندە وتەپ جاتىر» دەگەن اقپارات تاراعان. دەسە دە، جاقىندا يمان كارىموۆا ءوزىنىڭ «Instagram» پاراقشاسىنا  اناسى گۇلنارا كارىموۆاعا ۇقسايتىن اداممەن تۇسكەن فوتوسۋرەت جاريالادى.

"The Qazaq Times"