يتاليا ەۋروپالىق وداقتان شىعۋى مۇمكىن

يتاليا ۇلىبريتانيانىڭ ءىزىن جالعاپ، ەۋروپالىق وداق قۇرامىنان شىعۋى مۇمكىن. بۇل تۋرالى Spiegel.de باسىلىمى حابارلادى.

يتالياداعى «سولتۇستىك ليگا» پوپۋليستىك پارتياسىنىڭ وكىلى كلاۋديو بورگي جەرگىلىكتى باسىلىمدارعا سۇحبات بەرىپ، ەۋروپارلامەنتكە سايلانعان دەپۋتاتتاردىڭ اراسىندا پوپۋليست پارتياسىنىڭ وكىلدەرى از بولسا، يتاليا ەو-دان شىعادى دەپ مالىمدەدى. ول سوزىندە: «ءبىز ەۋروپانىڭ ساياسي قۇرىلىمىن، يتالياداعى جاعدايدى وزگەرتۋگە تىرىسامىز. بارلىعى مامىردا وتەتىن سايلاۋعا بايلانىستى»، – دەدى.

ەلدەگى پوپۋليستىك پارتيا مۇشەلەرىنە مامىردا وتەتىن سايلاۋ ماڭىزدى. الداعى سايلاۋدا پوپۋليستەر پارتياسى از داۋىس جيناسا، ەۋروپارلامەنتكە سايلانۋدان باس تارتپاق. ساراپشىلاردىڭ پىكىرىنشە، يتاليانىڭ ەۋروپالىق وداق قۇرامىنان شىعۋىنا تاعى ءبىر سەبەپ – ەلدەگى ەكونوميكالىق جاعدايدىڭ السىرەۋى. 2011 جىلى يتاليادا ەكونوميكالىق داعدارىس ورىن الىپ، زەينەتكەرلىك جاسى 67-گە دەيىن ۇلعايتىلعان بولاتىن. سوڭعى جىلدارداعى يتالياداعى ساياسي داعدارىستىڭ ەڭ باستى سەبەبى، پارلامەنتتەگى باسىم ورىندى ەشبىر پارتيا نەمەسە اليانستىڭ جەڭىپ الماۋى دەپ سانايدى ساراپشىلار. بۇل يتاليا پارلامەنتىن قاۋقارسىزدىققا الىپ كەلىپ، سوڭىندا ۇزاق جىلعا سوزىلعان ساياسي داعدارىستار مەن ەكونوميكالىق قيىنشىلىقتارعا ۇشىراتتى. سالدارىنان ەۋروايماقتىڭ ءۇشىنشى ۇلكەن ەكونوميكالىق ايماعى اۋقىمدى ساياسي تۇراقسىزدىققا تاپ بولدى.

بىلتىر وسى ماسەلەگە قاتىستى جيىن ءوتىپ، ەۋروكوميسسيا يتاليادان العاش رەت بيۋدجەت جوباسىن تولىقتىرۋدى تالاپ ەتتى. ريم الەۋمەتتىك باعدارلامالارعا قاتىستى بيۋدجەت كولەمىن 0,9%-عا ۇلعايتۋدى ۇسىنعانمەن، بريۋسسەل ونى كەرى قايتاردى. سەبەبى، ەكى تاراپ ۇسىنىسىنداعى ايىرماشىلىق 25 ميلليارد ەۋروعا جەتكەن. قازىردىڭ وزىندە يتاليا جۇمىسسىزدىق يندەكسى بويىنشا ەو ەلدەرى اراسىندا ءۇشىنشى ورىندا. ەلدەگى قارجىلىق داعدارىستى جانە جۇمىسسىزدىق دەڭگەيىن قالىپقا كەلتىرۋ ءۇشىن پرەزيدەنت سەردجو ماتتارەللو جاڭا رەفورما قابىلداناتىنىن مالىمدەدى. سونىمەن قاتار، شاكىرتاقى، زەينەتاقى جانە الەۋمەتتىك كومەككە بولىنەتىن قارجى ارتادى.

"The Qazaq Times"