فوتو: https://cdnvideo

اقش پرەزيدەنتى دونالد ترامپ ەۋروپا ەلدەرى سۇرياداعى ءوز سودىرلارىن قايتارۋ كەرەكتىگىن ايتتى.

ترامپ ءوزىنىڭ Twitter پاراقشاسىندا: «ءار مەملەكەت ءوز ازاماتتارىن ەلىنە قايتارىپ، ءتيىستى جازاسىن بەرۋى ءتيىس. سەبەبى، سودىرلار بوستاندىققا جىبەرىلسە، باسقا ايماقتاردا تەراكتىلەر ۇيىمداستىرىپ، حالىقارالىق قاۋىپسىزدىككە نۇقسان كەلتىرەدى»، – دەدى. مالىمەتتەر بويىنشا، ءسۇريا مەن يراككا ۇلىبريتانيا، فرانتسيا، گەرمانيا، شۆەتسيا، بەلگيادان التى مىڭنان استام ادام كەلگەن. سونداي-اق ترامپ اقش اسكەرىن ءسۇريا جەرىنەن شىعارعانىن اتاپ ءوتتى.
وتكەن جىلى اقش-تىڭ بۇۇ-داعى تۇراقتى وكىلى نيككي حەيلي اقش قارۋلى كۇشتەرى ءسۇريا جەرىنەن تەك 3 ءتۇرلى شارت ورىندالعاندا عانا شەگىنىپ شىعاتىنىن مالىمدەگەن بولاتىن. نيككي حەلي سوزىندە: «ءسۇريادان 3 شارت ورىنالماي تۇرىپ شەگىنبەيمىز. ەڭ اۋەلى حيميالىق قارۋ قولدانۋعا جول بەرە المايمىز; دايش تولىعىمەن جويىلۋى كەرەك; ءسۇريا جەرىندە يراننىڭ باقىلاۋىندا ايماقتىڭ بولمايتىنىنا كوز جەتكىزۋىمىز كەرەك»، – دەگەن. ال 2018 جىلدىڭ 24 جەلتوقسان كۇنى ترامپ ءسۇريا اۋماعىنان اقش اسكەرىن شىعارۋعا بايلانىستى قۇجاتقا قول قويعان. ونىڭ بۇل شەشىمىن فرانتسيا سياقتى وداقتاستارى «قاتەلىككە» بالاپ، ءوز قارسىلىقتارىن بىلدىرگەن. بۇنىمەن قاتار اق ءۇي اكىمشىلىگىنىڭ بۇل شەشىمىن العاشقىلاردىڭ ءبىرى بولىپ تۇركيا قولداعان. ساراپشىلار پىكىرىنشە، رەسمي انكارانىڭ ۋاشينگتوندى قولداۋىنىڭ گەوساياسي استارى بار. سەبەبى اقش اسكەرى ءسۇريا اۋماعىنان شىعارىلسا، تۇركياعا ءسۇريا كۇردتەرىنە قارسى كۇرەس جۇرگىزۋگە ەشكىم كەدەرگى كەلتىرە المايدى.

ءسۇريا پرەزيدەنتى باشار اسادتىڭ رەجيمى مەن تەررورلىق ۇيىمدار جانە ءارتۇرلى اسكەري توپتار اراسىنداعى قارۋلى قاقتىعىس 2011 جىلى باستالعان. وسى ۋاقىت ارالىعىندا 100 مىڭنان استام ادام كوز جۇمىپ، 5 ميلليونعا جۋىق سۇريالىق ەلدەن كەتۋگە ءماجبۇر بولعان. اقش باستاعان حالىقارالىق كواليتسيانىڭ «يسلام مەملەكەتى» تەررورلىق ۇيىمىنا قارسى وپەراتسياسى 2014 جىلدىڭ تامىز ايىندا يراك اۋماعىندا باستالعان. كەيىننەن ءدال وسى جىلدىڭ قىركۇيەك ايىندا ءسۇريا اۋماعىنا ويىسقان.

"The Qazaq Times"