تاجىكستان ءانۇرانى اۆتورىنىڭ نەمەرەسى سوتتالدى

دۋشانبە قالالىق سوتى تاجىكستاننىڭ حالىق اقىنى گۋلنازار كەلديدىڭ نەمەرەسى يكبول كەلديەۆتى 14 جىلعا سوتتادى.

28 جاستاعى يكبول كەلديەۆ "انسورۋللوح" ەكسترەميستىك ۇيىمىنىڭ مۇشەسى رەتىندە اۋعانستاندا "تاليبان" قوزعالىسى جاعىندا سوعىسقا قاتىسقان دەلىنگەن سوت شەشىمىندە. سوت وتىرىسى تۋىستارىنىڭ قاتىسۋىنسىز جابىق ەسىك جاعدايىندا وتكەن.

يكبول كەلديەۆتى 2018 جىلدىڭ اياعىندا اۋعان تۇرمەسىنەن تاجىكستانعا ەكستراديتسيالاعان. 2015 جىلى ول قۇندىز پروۆينتسياسىندا تالىبتەرمەن بىرگە ۇستالعان. وندا جالعان اۋعان تولقۇجاتى بولعان. 2016 جىلى اۋعانستان سوتى كەلديەۆتى ۇكىمەتكە قارسى سوعىستى، جالعان قۇجات جاسادى دەگەن ايىپپەن 16 جىلعا سوتتاعان.

​يكبول كەلديەۆتىڭ اتاسى، حالىق اقىنى گۋلنازار كەلدي نەمەرەسىنىڭ شىن مانىندە سوتتالعانىن مويىندادى. "يكبول – مەنىڭ نەمەرەم. ول رەسەيگە جۇمىس ىستەۋگە كەتكەن ەدى. ول جاقتا ەكسترەميستىك توپتىڭ ىقپالىنا ءتۇستى. الدىمەن پاكىستانعا بارعان، ول جاقتان جارالانىپ، اۋعانستانعا وتكەن. ول كىناسىن مويىندادى، قازىر وكىنەدى", - دەدى تاجىكستاننىڭ حالىق اقىنى.

"The Qazaq Times"