اۋعانستاندىق «تاليبان» قوزعالىسىنىڭ مۇشەلەرى رەسەيدەگى ىمىرالاستىق كەلىسسوزگە قاتىستى. بۇل تۋرالى رەسمي Reuters اگەنتتىگى مالىمدەدى.

كەلىسسوزدە «تاليبان» راديكالدى قوزعالىسى ۇيىمىنىڭ وكىلى شەر موحاممەد ابباس ستانيكزاي وزدەرىنە سالىنعان سانكتسيالاردى الىپ تاستاۋ تۋرالى ۇسىنىس بىلدىرگەن. دەلەگاتسيا باسشىسىنىڭ ايتۋىنشا، سانكتسيالىق شەكتەۋ قوزعالىس ۇيىمىنا بەيبىت كەلسسوزدەرگە قاتىسۋ ءۇشىن كەدەرگى كەلتىرەدى.
كرەمل ۇيىمداستىرعان باسقوسۋعا جالپى سانى ون ەكى ەلدىڭ مۇشەلەرى قاتىسادى دەپ جوسپارلانعان. ولاردىڭ قاتارىندا قىتاي، يران، وزبەكستان، تاجىكستان مەن «تاليبان» وكىلدەرى بار. ال اقش رەسەيدى «سودىرلارعا زاڭسىز تۇردە قارۋ-جاراق جەتكىزەدى» دەپ سىنعا الدى. سول سەبەپتى قۇراما شتاتتارى مەن اۋعانستان ۇكىمەتى بۇل جيىنعا قاتىسۋدان تۇبەگەيلى باس تارتتى.

وسىعان دەيىن CNN ارناسى رەسەيلىك كالاشنيكوۆ، سنايپەرلىك ۆينتوۆكالارمەن قارۋلانعان «تاليبان» قوزعالىسىنىڭ سودىرلارى بەينەلەنگەن بەينەروليك پەن فوتو كورسەتكەن بولاتىن. ال ناتو، اقش جانە ەۋرووداق ەلدەرىنىڭ بىرىككەن اسكەري كۇشتەرىنىڭ باسشىسى كەرتيس سكاپاروتتي رەسەيدى «تاليبان» قوزعالىسىن قولداپ وتىر دەپ ايىپتاعان ەدى. بۇدان بولەك «The Times» باسىلىمى رەسەي وزبەكستان ارقىلى اۋعانستانداعى «تاليبان» قوزعالىسىنا تەگىن مۇناي جەتكىزىپ وتىرعانىن، ال قوزعالىس مۇشەلەرى ءوز كەزەگىندە مۇنايدى ساتۋ ارقىلى ايىنا 2,5 ميلليون دوللار كولەمىندە پايدا تاپقانىن جازدى.

ايتا كەتەيىك، بۇۇ-نىڭ قاۋىپسىزدىك كەڭەسى مەن رەسەي جوعارى سوتى اتالعان ۇيىمدى تەررورلىق توپ دەپ تانىعانمەن، بەيبىت شاراعا شاقىرتۋ بەرگەن. شەتەلدىك جانە ءورىستىلدى باق رەسەيدىڭ بۇل قادامىن «تەررورلىق توپتاردى قولداۋشى» دەپ باعالادى.

"The Qazaq Times"