فوتوكوللاج: Tengrinews.kz

اقپارات جانە كوممۋنيكاتسيا ءمينيسترى داۋرەن اباەۆ ورتتەن قايتىس بولعان بەس بۇلدىرشىنگە قاتىستى مالىمدەمە جاسادى - دەپ حابارلايدى قازاقپارات.

«بولعان وقيعا ۇلكەن تراگەديا. قازىر قارا جامىلعان وتباسىنىڭ باسىنا تۇسكەن قايعىنى ەڭ جامان تۇسىڭدە دە كورمەيسىڭ. بۇكىل ەل وسى وتباسىمەن بىرگە قارا جامىلدى» -دەدى اباەۆ.

بۇدان بولەك اباەۆ مىرزا اتالمىش وقيعاعا بايلانىستى الەۋمەتتىك جەلىلەردە «ەڭبەك جانە حالىقتى الەۋمەتتىك قورعاۋ ءمينيسترى مادينا ابىلقاسىموۆانىڭ وتستاۆكاعا كەتۋىن» تالاپ ەتكەن حالىق نارازىلىعىنا قاتىستى پىكىر ءبىلدىردى.

«مەنىڭ ويىمشا، بەس بالانىڭ ولىمىنە ابىلقاسىموۆانى كىنالاۋ ادىلەتسىز. ءيا، ەشكىم جاۋاپكەرشىلىكتەن قۇتىلماۋى كەرەك. تۇپتەپ كەلگەندە ءبىز - مەملەكەتتىك اپارات ەلدە بولىپ جاتقان وقيعالارعا جاۋاپتىمىز. بىراق، بۇل قايعىلى وقيعا ءارتۇرلى فاكتورلاردىڭ سالدارىنان بولعانىن ۇمىتپاۋىمىز قاجەت. بارلىعى ەڭبەك جانە حالىقتى ادەۋمەتتىك قورعاۋ مينيسترلىگىنە بايلانىستى ەمەس. مادينا ەراسىلقىزى ايەل رەتىندە، ءۇش بالانىڭ اناسى رەتىندە بۇل تراگەديانى قايعىرا قابىل الدى. مەن كوسترۋكتيۆتى سىن قالىپ، ايتاقتاۋ، ايداپ سالۋ بولمايدى دەپ ۇمىتتەنەمىن. ونىڭ ۇستىنە مەن ابىلقاسىموۆانىڭ وزىنە تاپسىرىلعان جۇمىسقا ءاتۇستى قارامايتىن ءوز ءىسىنىڭ شەبەرى ەكەندىگىن بىلەمىن» - دەپ مالىمدەدى اقپارات جانە كوممۋنيكاتسيا ءمينيسترى.

ەستەرىڭىزگە سالايىق، اقپان ايىنىڭ 3-ىنەن 4-ىنە قاراعان ءتۇنى استانا قالاسىنىڭ كوكتال-1 ىقشام اۋدانىندا جەكە تۇرعىن ءۇي ورتەنىپ، سالدارىنان بەس ءبۇلدىرشىن كوز جۇمعان. بۇل وقيعا قوعامدا قىزۋ تالقىلانىپ، الەۋمەتتىك جەلىلەردە ازاماتتىق بەلسەندىلەر مەن جۋرناليستەر ەڭبەك جانە حالىقتى الەۋمەتتىك قورعاۋ ءمينيسترى مادينا ابىلقاسىموۆانىڭ وتستاۆكاعا كەتۋىن تالاپ ەتكەن.

"The Qazaq Times"