جاقىپوۆا: بالام ءۇش ايعا تولماي جۇمىسقا شىقتىم، بىراق اقشا تابۋ ماقساتىندا ەمەس

استانا قالاسىنداعى اۋىر قازا مينيسترلىكتەگىلەردى ۇيقىسىنان وياتقان ىسپەتتى. ءبىرى، مۇنداي قازاعا قايعىرا كوڭىل ايتسا، ەندى ءبىرى اتا-اناسىن سوتقا تارتۋمەن الەك. باق وكىلدەرى مەن الەۋمەتتىك جەلىدە شۋلاعان تۇرعىندار بۇل وقيعانىڭ جىلى جابىلۋىنا جول بەرە قويمادى.

قازا تاپقان بەس قىزدىڭ ەڭ كىشىسى ءۇش ايلىق ەكەندىگىن ەسكەرگەن ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا دەكرەتتىك جاسقا دەيىنگى بالا كۇتىمىنە بەرىلەتىن جاردەماقىنىڭ مەرزىمىن ۇزارتۋدى جوسپارلاپ وتىرعاندىعىن جەتكىزدى.

ۆيتسە-ءمينيستردىڭ سوزىنشە: "ەڭبەك جانە حالىقتى الەۋمەتتىك قورعاۋ مينيسترلىگى دەكرەتتەگى ايەلدەرگە جاردەماقى بەرۋ مەرزىمىن ۇزارتۋ تۋرالى بىرنەشە رەت ۇسىنىس جاساعان بولاتىن. بيۋدجەتتىك قاراجاتتى ەسكەرە وتىرىپ، ءبىز رەسپۋبليكالىق بيۋدجەتتىك كوميسسياعا ءوتىنىش قالدىرعانبىز. ءبىزدىڭ ۇسىنىس الى ماقۇلدانبادى. ەندى تاعى دا ۇسىنىس جاسايمىز", - دەدى.

سونىمەن قاتار، سابيلەرىنىڭ ءبىر جاسقا تولعانىن كۇتپەستەن جۇمىسقا شىققان ايەلدەرگە ەشقانداي ماجبۇرلىك كورسەتە المايتىندىعىن دا جەتكىزگەن. الايدا، ۇكىمەتتەن بەرىلەتىن جاردەماقىنىڭ تىم از ەكەندىگىن ەسكەرمەگەن ۆيتسە-مينيستر جاڭا بوسانعان انالاردىڭ تىرلىككە ارالاسۋىن باسقاشا ەلەستەتەتىن ىسپەتتى. وعان، جاقىپوۆانىڭ مىنا ءسوزى دالەل:  مەن جۇمىسقا شىققان كەزدە بالام ءۇش ايعا تولماعان ەدى. ونىمەن بىرگە جۇمىس ىستەپ، ىسساپارعا دا شىعاتىنمىن. بىراق مەن جۇمىسقا اقشا تابۋ ماقساتىندا شىققان جوقپىن", - دەگەن باسشى قاراپايىم حالىقتى وزىمەن دەڭگەيلەس كورەتىندىگىن اڭعارتقانداي بولدى. دەگەنمەن، ايلىعى-شايلىعىنا جەتپەگەن وتباسىلار ەڭبەك ىسىنە ەرىككەننەن ارالاسپايتىندىعى ھاق.

"The Qazaq Times"