«وتستاۆكاعا اپارار جول»: رايىمقۇلوۆانىڭ ورىنباسارى ۇستالدى

مادەنيەت جانە سپورت ۆيتسە-ءمينيسترى ساكەن مۇسايبەكوۆ ۇستالدى دەپ حابارلادى دەرەككوزگە سۇيەنگەن قازتاگ اگەنتتىگى.

«مۇسايبەكوۆتى سىبايلاس جەمقورلىقپەن كۇرەس ءىس-قيمىل اگەنتتىگىنىڭ قىزمەتكەرلەرى ۇستادى. ول قازىر الماتىدا تەرگەۋ امالدارىنا قاتىسىپ جاتىر» دەدى دەرەككوزى اقپارات قۇرالىنا.

جەمقورلىقپەن كۇرەس ءىس-قيمىل اگەنتتىگىنىڭ ءباسپاسوز قىزمەتى ازىرگە اقپاراتقا تۇسىنىكتەمە بەرمەدى. بۇعان دەيىن تەلەگرامداعى Yedilov ارناسى دا دەرەككوزگە سۇيەنە وتىرىپ، مۇسايبەكوۆتىڭ «جەمقورلىق كۇدىگىنە» ىلىنگەنىن جازعان.

مادەنيەت جانە سپورت مينيسترلىگىنىڭ رەسمي سايتىنداعىمالىمەتكە سايكەس, مۇسايبەكوۆ سپورت سالاسىنا جاۋاپتى بولعان.

53 جاستاعى ساكەن مۇسايبەكوۆ 2020 جىلدىڭ مامىر ايىندا مادەنيەت جانە سپورت ۆيتسە-ءمينيسترى قىزمەتىنە تاعايىندالعان. وعان دەيىن 2019 جىلدىڭ قاڭتار ايىنان باستاپ قازاقستان ۇلتتىق وليمپيادا كوميتەتىنىڭ باس حاتشىسى بولعان. ول بۇعان دەيىن دە – 2015 جىلدىڭ اقپان ايى مەن 2019 جىلدىڭ قاڭتار ايلارى ارالىعىندا مادەنيەت جانە سپورت ۆيتسە-ءمينيسترى بولعان. پرەمەر-مينيستر سايتىنداعى اقپاراتقا سايكەس، «ءوتىنىش بويىنشا» قىزمەتىنەن بوساعان.

توقاەۆ قول قويعان «مەملەكەتتىك قىزمەت تۋرالى» زاڭنىڭ 60-بابى 3-تارماعىنا ساي، ساياسي قىزمەتشى سىبايلاس جەمقورلىق قىلمىسىن جاساسا، ءبىرىنشى باسشى وتستاۆكاعا كەتۋگە ارىز جازۋى ءتيىس.

“The Qazaq Times”