فوتو: static.riafan.ru

اقش ادىلەت مينيسترلىگى قىتايدىڭ Huawei Technologies تەلەكوممۋنيكاتسيالىق كومپانياسى مەن ونىڭ قارجى ديرەكتورى مىڭ ۆانجوۋعا بىرنەشە قىلمىستىق ءىس بويىنشا ايىپ تاقتى.

ولار، اتاپ ايتقاندا، بانك شوتتارىنا قاتىستى الاياقتىق، سوت تورەلىگىنە كەدەرگى كەلتىرۋ ءىسى جانە امەريكالىق T-Mobile كومپانياسىنىڭ تەحنولوگيالارىن ۇرلاعانى ءۇشىن ايىپتالىپ وتىر.

1 جەلتوقساندا Huawei كومپانياسى باسشىسىنىڭ قىزى جانە قارجى ديرەكتورى مىڭ ۆانجوۋ ۋاشينگتوننىڭ سۇراۋى بويىنشا كانادا مەملەكەتىندە تۇتقىندالعان بولاتىن. بۇل جاعداي كانادا مەن قىتاي قارىم-قاتىناسىنا سىزات ءتۇسىردى. رەسمي ۋاشينگتون اتالعان ايىپتاۋلاردا Huawei كومپانياسى اقش بيلىگىنىڭ يرانمەن بايلانىسىنا قاتىستى ەكى ەنشىلەس كومپانيالارمەن، «Huawei Device USA» جانە «Skycom Tech» قارىم-قاتىناستارىنا قاتىستى جالعان اقپارات تاراتىپ كەلگەنىن ايتتى. بۇدان وزگە ايىپتاۋعا سايكەس، قىتايلىق كومپانيا امەريكالىق T-Mobile تەحنولوگياسىن ۇرلاعان.

اقش ساۋدا ءمينيسترى ۋيلبۋر روسس Huawei-گە قاتىستى ايىپتاۋ اقش پەن قىتاي اراسىنداعى ساۋدا قاتىناسىنا ەشقانداي قاتىسى جوق دەپ مالىمدەدى. ەندى ۋاشينگتونعا كوپ ۇزاماي ەكى ەل اراسىنداعى ساۋدا سوعىسىن توقتاتۋ تۋرالى كەلىسسوزدەر جۇرگىزۋ ءۇشىن قىتايدان جوعارى لاۋازىمدى دەلەگاتسيا كەلمەك.

ايتا كەتەيىك، Huawei – قىتايدا «ۇلتتىق چەمپيون» دەگەن اتاققا يە بولعان كومپانيا. ونىڭ ماقساتى – تەحنيكالىق سالادا كوشباسشى بولۋ. الايدا، سوڭعى جىلدارى قىتايلىق كومپانياعا الاياقتىق باپتارىنا سايكەس بىرنەشە ايىپتار تاعىلىپ، الەمدىك ارەناداعى بەدەلىنە نۇقسان كەلدى. اقش-تىڭ قارجى مينيسترلىگى ۇسىنعان ايىپتاۋلار ەڭ ماڭىزدى، ءارى كۇردەلىسى جانە بۇل ءىس ەكى ەل اراسىنداعى ساۋدا سوعىسىن تۇتاندىرۋشى بولىپ سانالادى.

"The Qazaq Times"