فيليپپيندە كاتوليكتىك شىركەۋدە جارىلىس بولدى

ءفيليپپيننىڭ وڭتۇستىگىندە كاتوليكتىك شىركەۋدە قاتارىنان ەكى رەت جارىلىس بولىپ، 27 ادام قازا بولدى جانە 77 ادام جاراقات الدى. فيليپپين ۇكىمەتى جاساعان مالىمدەمەدە جارىلىس جاساعانداردى ىزدەستىرىپ جاتقانىن ايتقان جانە «ىسكە قاتىستى ەشبىر ادام قۇتىلىپ كەتپەيدى، ءبارى دە ءتيىستى جازاسىن الادى»، – دەلىنگەن.

جەرگىلىكتى اقپارات قۇرالدارىنىڭ حابارىنا قاراعاندا، بومبالى شابۋىل سۋلۋ پروۆينتسياسىنا ورنالاسقان حەلۋ قالاسىنداعى كاتوليكتىك شىركەۋگە باعىتتالعان.

شىركەۋ ىشىندە بولعان العاشقى جارىلىستان كەيىن، وقيعا ورنىنا كوپتەگەن ۇكىمەت قىزمەتكەرلەرى مەن قاۋىپسىزدىك كۇشتەرى جەتەدى، وسى كەزدە شىركەۋدىڭ اۆتوتۇراعىندا ەكىنشى رەت جارىلىس بولادى.

مالىمەتتەردە قازا بولعاندار اراسىندا ۇكىمەتتىك جانە قاۋىپسىزدىك كۇشتەرىنىڭ وكىلدەرى دە بار ەكەنى ايتىلعان.

قازىرگە دەيىن بىردەي ءبىر ۇيىم اتالعان شابۋىلدى ءوز موينىنا المادى. دەگەنمەن، سۋلۋ ايماعىندا يسلامدىق قارۋلى توپ «ابۋ سايافتىڭ» جەتەكشىلەرى جاسىرىنعان ءوڭىر. كەزەكتى شابۋىلعا كوپتەگەن تاراپتار اتالعان تەررورلىق ۇيىمدى ايىپتاۋدا.

ايتا كەتەيىك، شابۋىلدان بىرنەشە كۇن بۇرىن سۋلۋ پروۆينتسياسىنىڭ اۆتونوميا الۋى تۋرالى وڭىردە رەفەرەندۋم وتكەن بولاتىن. الايدا، داۋىس بەرۋ ناتيجەسى بويىنشا سۋلۋ پروۆينتسياسىنىڭ اۆتونوميا الا المادى. فيليپپين حالقىنىڭ باسىم كوبى كاتوليك سەنىمىن ۇستانادى، اتالعان حەلۋ قالاسى مۇسىلماندار كوبىرەك قونىستانعان ءوڭىر بولىپ سانالادى.

“The Qazaq Times”