قازاقستان رەسپۋبليكاسىنىڭ مەملەكەتتىك ءتىلى – قازاق ءتىلى. بۇل قازاقستان رەسپۋبليكاسىنىڭ اتا زاڭى - كونستيتۋتسيامەن بەلگىلەنگەن انا ءتىلىمىزدىڭ مارتەبەسى. قازاق ەلى ءوزىنىڭ انا ءتىلىن ەڭ بيىك دارەجەدە كورگىسى كەلەتىنى ايقىن. وسى رەتتە قازاقستان رەسپۋبليكاسىنىڭ اۋماعىندا مەملەكەتتىك ءتىلدىڭ مارتەبەسىن لايىقتى دەڭگەيگە كوتەرۋ، مەملەكەتتىك ءتىل ساياساتىن ناسيحاتتاۋ جانە اسكەري قىزمەتشىلەر اراسىندا ءتۇسىندىرۋ جۇمىستارىن جۇرگىزۋ قاجەتتىلىگى تۋىندايدى.

وسىعان وراي 2017 جىلدىڭ 21 اقپان كۇنى  ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى 5547 اسكەري بولىمىندە وفيتسەرلەر مەن كەلىسىمشارت بويىنشا اسكەري قىزمەتشىلەرگە مەملەكەتتىك ءتىلدى دەڭگەيلىك وقىتۋدىڭ باسىم باعىتتارىن ءتۇسىندىرۋ ماقساتىندا «21 اقپان – حالىقارالىق انا ءتىلى كۇنى» قارساڭىندا قىزىلوردا وبلىستىق ىشكى ساياسات باسقارماسى قىزىلوردا وبلىسىنىڭ تىلدەردى وقىتۋ ورتالىعىنىڭ وقىتۋشىسى ءا.باحىتوۆانىڭ، ءا. احمەتوۆانىڭ قاتىسۋىمەن «انا ءتىلىم - ايبىنىم» تاقىرىبىندا اشىق ساباق وتكىزىلدى.

اشىق ساباق ەكى توپقا بولىنگەن اسكەري قىزمەتشىلەردىڭ قاتىسۋىمەن سايىس تۇرىندە وتكىزىلدى. سايىس بارىسىندا توپتارعا بولىنگەن اسكەري قىزمەتشىلەر قازاق ءتىلىنىڭ گرامماتيكاسىن ءبىلۋ بويىنشا جارىسقا ءتۇستى. سونداي-اق اشىق ساباق بارىسىندا تىڭدالىم بولىگى بويىنشا اۋديوماتىنگە سايكەس تەست تاپسىرمالارى ورىندالدى.

سايىس سوڭىندا توپتارعا «قۇنانباي» اتتى قىسقاشا ءفيلمى كورسەتىلىپ، سايىسكەرلەرگە ونداعى بەينەلەنگەن قازاق ەلىنىڭ سالت-داستۇرلەرى مەن ادەت-عۇرىپتارى تۋرالى  قىسقاشا شىعارمالار جازۋ مىندەتتەلدى.

اشىق  ساباقتى  وتكىزۋگە 5547 اسكەري ءبولىمىنىڭ مەملەكەتتىك ءتىل سىنىبى  ارنايى كورنەكىلىكتەرمەن جابدىقتالىپ، ەلەكتروندى ەكران ارقىلى اسكەري قىزمەتشىلەرگە سلايدتار كورسەتىلدى.

«اشىق  ساباقتان اسكەري قىزمەتشىلەر، ياعني سايىسكەرلەر وتە جاقسى اسەر الدى. ساباقتىڭ قىزىقتى وتكەنى سونشا، ءتىپتى سايىسكەرلەر وقۋشىلار سەكىلدى تاپسىرمالاردى بۇلجىتپاي ورىنداپ، قازاق ءتىلىن بيىك دەڭگەيدە بىلەتىندىكتەرىن دالەلدەپ جاتتى. مەن بۇعان ءدان ريزا بولدىم! بۇنداي ءىس-شارالار الداعى ۋاقىتتا ءالى دە جالعاسىن تاباتىن بولادى. مەملەكەتتىك ءتىل – بۇل ەلدىگىمىزدىڭ ايبارى. ءتىل بار جەردە عانا ەل، ۇلت، مەملەكەت بولادى. ەلباسىمىز ن. نازارباەۆتىڭ دا ۇنەمى مەملەكەتتىك تىلگە زور كوڭىل ءبولىپ جۇرگەنى وسىنىڭ ايعاعى!» - دەدى اشىق ساباقتى ۇيىمداستىرۋشى، وسى ءبولىمنىڭ مەملەكەتتىك ءتىلدى ەنگىزۋ جونىندەگى مامانى  قاتارداعى ءرازيا مۇحامەدجانوۆا.

قىزىقتى دا اسەرلى وتكەن اشىق ساباق قورىتىندىسى بويىنشا وزىق شىققان  جەڭىمپازدار گراموتالارمەن جانە باعالى سىيلىقتارمەن ماراپاتتالدى. بۇل تۋرالى «وڭتۇستىك» وڭىرلىك قولباسشىلىعىنىڭ قوعاممەن بايلانىس جونىندەگى وفيتسەرى ايدوس بايشاعىروۆ حابارلادى.

“The Qazaq Times”