اقش كونگرەسى ترامپ ۇسىنعان جوسپارلاردى قابىلداۋدان باس تارتتى

اقش كونگرەسىندەگى دەموكراتتار پرەزيدەنت دونالد ترامپتىڭ فەدەرالدىق ۇكىمەت جۇمىسىن جانداندىرۋ ماسەلەسى تۋرالى ۇسىنىستارىن قابىلداۋدان باس تارتتى.

ترامپتىڭ ۇسىنىسى بويىنشا، ۆيزالىق مەرزىمى اياقتالعان ميگرانتتاردى دەپورتاتسيالاۋدى كەيىنگە شەگەرۋ كەرەك. وسى ارقىلى زاڭسىز ميگراتسيادان ارىلۋعا بولادى. سونىمەن قاتار، اق ءۇي باسشىسى مەكسيكامەن اراداعى شەكارانى كۇشەيتۋگە 5,7 ميلليارد دوللارعا جۋىق قارجى ءبولۋدى ءالى دە تالاپ ەتىپ وتىر. ترامپ شەكاراداعى اسكەري توپتار مەن قورعانداردى كۇشەيتۋ ارقىلى وزگە ايماقتاردان كەلەتىن زاڭسىز ميگرانتتارعا توسقاۋىل بولماق. بىراق، پرەزيدەنتتىڭ بۇل جوسپارىن نەنسي پەلوسي باستاعان ءبىر توپ كونگرەسسمەندەر سىنعا الىپ، قابىلداۋدان باس تارتتى. وسى رەتتە دەموكراتتار ەكى زاڭ جوباسىن ۇسىنىپ وتىر. ولاردىڭ ءبىرى – اقش ىشكى قاۋىپسىزدىك مينيسترلىگىنىڭ جۇمىسىن 8 اقپانعا دەيىن رەتتەۋ، ال ەكىنشىسى – قالعان ۆەدومستۆولاردىڭ جۇمىسىن 30 قىركۇيەككە دەيىن رەتتەۋ تۋرالى زاڭ.

ەسكە سالا كەتەيىك، 22 جەلتوقساننان باستاپ اقش-تا شاتداۋن – ۇكىمەت قۇرىلىمدارىنىڭ جۇمىسىن ءىشىنارا توقتاتۋ باستالدى. سول سەبەپتى ءالى كۇنگە دەيىن ەل بيۋدجەتى تولىق بەكىتىلگەن جوق. بەكىتىلمەگەن بيۋدجەت سالدارىنان 22 جەلتوقساننان بەرى اقش فەدەرالدى بيلىگىنىڭ جۇمىسى ءىشىنارا توقتاتىلدى. بۇل ىشكى قاۋىپسىزدىك مينيسترلىگى، ساۋدا مينيسترلىگى، ءىىم مەن قارجى مينيسترلىگىنە قاتىستى. سونىمەن قاتار، سميتسون ينستيتۋتىنىڭ ۇلتتىق ساياباقتارى مەن مۇراجايلارى جابىلدى. 800 مىڭنان استام مەملەكەتتىك قىزمەتكەر اقىلى دەمالىسقا كەتتى.

"The Qazaq Times"