Foto: mediad.publicbroadcasting.net

AQŞ Kongresindegi demokrattar prezident Donal'd Tramptıñ federaldıq ükimet jwmısın jandandıru mäselesi turalı wsınıstarın qabıldaudan bas tarttı.

Tramptıñ wsınısı boyınşa, vizalıq merzimi ayaqtalğan migranttardı deportaciyalaudı keyinge şegeru kerek. Osı arqılı zañsız migraciyadan arıluğa boladı. Sonımen qatar, Aq üy basşısı Meksikamen aradağı şekaranı küşeytuge 5,7 milliard dollarğa juıq qarjı böludi äli de talap etip otır. Tramp şekaradağı äskeri toptar men qorğandardı küşeytu arqılı özge aymaqtardan keletin zañsız migranttarğa tosqauıl bolmaq. Biraq, prezidenttiñ bwl josparın Nensi Pelosi bastağan bir top kongressmender sınğa alıp, qabıldaudan bas tarttı. Osı rette demokrattar eki zañ jobasın wsınıp otır. Olardıñ biri – AQŞ işki qauipsizdik ministrliginiñ jwmısın 8 aqpanğa deyin retteu, al ekinşisi – qalğan vedomstvolardıñ jwmısın 30 qırküyekke deyin retteu turalı zañ.

Eske sala keteyik, 22 jeltoqsannan bastap AQŞ-ta şatdaun – ükimet qwrılımdarınıñ jwmısın işinara toqtatu bastaldı. Sol sebepti äli künge deyin el byudjeti tolıq bekitilgen joq. Bekitilmegen byudjet saldarınan 22 jeltoqsannan beri AQŞ federaldı biliginiñ jwmısı işinara toqtatıldı. Bwl İşki qauipsizdik ministrligi, Sauda ministrligi, İİM men Qarjı ministrligine qatıstı. Sonımen qatar, Smitson institutınıñ wlttıq sayabaqtarı men mwrajayları jabıldı. 800 mıñnan astam memlekettik qızmetker aqılı demalısqa ketti.

"The Qazaq Times"