برازيليا جاڭا پرەزيدەنتىن ۇلىقتادى

برازيليانىڭ جاڭا پرەزيدەنتى جاير بولسونارۋ رەسمي تۇردە قىزمەتىنە كىرىستى. بۇل تۋرالى lemonde.fr حابارلادى.

63 جاستاعى بولسونارۋ 1985 جىلدان بەرى ءبىرىنشى رەت بيلىك باسىنا كەلگەن اسىرە وڭشىل ساياساتكەر. پرەزيدەنتتى ۇلىقتاۋ ءراسىمى ۇلتتىق كونگرەسستە سوت جانە زاڭ شىعارۋشى بيلىك وكىلدەرى مەن شەتەلدىك لاۋازىمدى تۇلعالاردىڭ قاتىسۋىمەن ءوتتى. رەسمي جيىندا جاير بولسونارۋ پارلامەنت الدىندا انت قابىلداپ، بيلىكتى جەمقور ساياساتكەر-باسشىلاردان تازارتىپ، حالىقتى قيىندىققا دۋشار ەتكەن سوتسياليستىك يدەولوگيادان باس تارتاتىنىن ايتتى. مەملەكەت ءۇشىن نەگىزگى ماسەلەگە اينالعان برازيليا مەن ۆەنەسۋەلا اراسىنداعى شەكارا داۋىن رەتكە كەلتىرىپ، برازيليالىقتار دەموكراتيالىق جولمەن تاڭداعان باعدارلامانى جۇزەگە اسىرۋ تۋرالى ۋادە بەردى.

28 قازاندا برازيليادا پرەزيدەنتتىك سايلاۋدىڭ ەكىنشى كەزەڭى ءوتىپ، ناتيجەسىندە سوتسيال-ليبەرالدى پارتيا وكىلى جاير بولسونارۋ جەڭىسكە جەتكەن. ال وسىعان دەيىن برازيليا ۇكىمەتىنىڭ باسشىسى قىزمەتىندە بولعان ميشەل تەمەرگە بىرنەشە مارتە جەمقورلىق جاسادى دەگەن ايىپ تاعىلعان. رەسمي مالىمەتتەر بويىنشا، ميشەل تەمەر برازيلياداعى ءىرى كولىك كومپانياسىنىڭ قىزمەتىن ىلگەرىلەتۋ ءۇشىن كومپانيا باسشىسىنان 6 ميلليون دوللار كولەمىندە پارا العان. برازيليا جوعارعى سوتىنىڭ شەشىمىمەن «پارا العان» كۇدىكتى تەرگەۋگە الىندى. بۇدان بولەك، مەملەكەتتىڭ ەكس-پرەزيدەنتى لۋلا دا سيلۆاعا دا ءدال وسىنداي ايىپ تاعىلىپ، بىرنەشە مەرزىمگە باس بوستاندىعىنان ايىرىلعان بولاتىن. ەندى جەرگىلىكتى تۇرعىندار جاڭا پرەزيدەنت بولسونارۋدىڭ برازيلياداعى الەۋمەتتىك جاعدايدى جاقسارتىپ، جەمقورلىقتى تۇبەگەيلى جوياتىنىنا سەنىم ءبىلدىرىپ وتىر.

"The Qazaq Times"