برازيليادا ۇكىمەتكە قارسى ءىرى ميتينگ باستالدى. نارازىلار «جەمقور باسشى، جەمقور جۇيە قاجەت ەمەس» دەپ، پرەزيدەنتتىڭ وتستاۆكاسىن تالاپ ەتىپ جاتىر.

سان-پاۋلۋ مەن ريو-دە-جانەيرو كوشەلەرىنە مىڭداعان ادام شىققان. ولار ەلدىڭ قازىرگى پرەزيدەنتى جاير بولسونارۋدى «جەمقورلىققا جول بەردى جانە كوروناۆيرۋسقا قارسى دۇرىس ساياسات جۇرگىزە المادى» دەيدى.

برازيليادا ىندەت 500 مىڭنان استام ادامنىڭ ءومىرىن قيعان. پوليتسيا نارازى توپتى تاراتۋ ءۇشىن كوزدەن جاس اعىزاتىن گاز قولدانىپ، سوڭى قاقتىعىسقا ۇلاستى. ازىرگە جاراقات العاندار تۋرالى اقپارات جوق.

فوتو: REUTERS

تاياۋدا جوعارعى سوت پرەزيدەنتتىڭ ۇستىنەن قىلمىستىق ءىس قوزعاعان. وعان ءۇندىستاننىڭ «كوۆاكسين» ۆاكتسيناسىن ساتىپ الۋ بارىسىندا اقشا جىمقىردى دەگەن ايىپ تاعىلىپ وتىر. بولسونارۋ وزىنە تاعىلعان ايىپتاردى جوققا شىعاردى.

سونىمەن قاتار ەل باسشىسى ۆيرۋستىڭ قاۋپى اسىرەلەنگەن دەپ، ىندەتپەن كۇرەس جونىندەگى شارالارعا جانە Covid ەكپەلەرىنە سەنىمسىزدىكپەن قاراعان.

Reuters اگەنتتىگىنىڭ دەرەگىنشە، برازيليادا حالىقتىڭ نەبارى 11%-ى عانا Covid ەكپەسىن العان. قىس ايلارىنىڭ كەلۋىمەن (جەردىڭ ەكۆاتوردان تومەن بولىگىندە ماۋسىم، شىلدە، تامىز قىس ايلارى سانالادى) احۋال ۋشىعۋى مۇمكىن.

ەلدەگى Fiocruz بيومەديتسينالىق ورتالىقتىڭ زەرتتەۋشىسى رافاەل گيماراەس برازيليادا ەكپە ناۋقانى باياۋ ءجۇرىپ جاتقانىن، سول سەبەپتى ونىڭ اسەرى تەك قىركۇيەككە دەيىن سەزىلمەيتىنىن ايتادى. ونىڭ سوزىنشە، جاعداي وسىلاي جالعاسا بەرسە كۇنىنە 3 مىڭ ادام كوز جۇمعان ناۋرىز-ساۋىردەگى احۋال قايتادان ورىن الۋى مۇمكىن.

"The Qazaq Times"