فوتو: silkroadnews.org

اقش پرەزيدەنتى دونالد ترامپ امەريكالىق كومپانيالارعا قىتايلىق «ZTE» جانە «Huawei» قۇرىلعىلارىن ساتىپ الۋعا جانە قولدانۋعا تىيىم سالماق.

Reuters اگەنتتىگىنىڭ حابارلاۋىنشا، اق ءۇي باسشىسىنىڭ وسى ماسەلەگە قاتىستى جارلىعى قاڭتاردا جاريالانادى. قۇجاتتا قىتايلىق قۇرىلعىلار «ەلدىڭ ۇلتتىق قاۋىپسىزدىگىنە نۇقسان كەلتىرەدى» دەپ كورسەتىلەدى. رەسمي ۋاشينگتون اتالعان كومپانيالار قىتاي ۇكىمەتىنە جۇمىس ىستەيتىنىن جانە قۇرالدارىنا تىڭشىلىق ءۇشىن جاسىرىن قوندىرعىلار ورناتقانىن ايتتى.

اقش قىتايلىق ءىرى تەحنولوگيا كومپانياسى سانالاتىن «Huawei» قۇرىلعىلارىن قاراشادا قاتاڭ تەكسەرۋدەن وتكىزگەن بولاتىن. امەريكا بارلاۋ قىزمەتكەرلەرىنىڭ ايتۋىنشا، «Huawei»، «ZTE» سىندى تەحنولوگيا كومپانيالارى قىتاي ۇكىمەتىنىڭ شەتەلدەردەگى تىڭشىلىق مۇمكىندىكتەرىن ارتتىرادى. اقش ۇكىمەتى لاۋازىمدىلارىنىڭ «Huawei» جابدىقتارىن كەڭىنەن پايدالاناتىن وداقتاس ەلدەردەگى مەملەكەت قىزمەتكەرلەرىمەن جانە تەلەكوممۋنيكاتسيا سالاسىنىڭ باسشىلارىمەن تىعىز بايلانىس ورناتىپ وتىرعانىن ايتتى. سونداي-اق، ولارعا جەلى قاۋىپسىزدىگىنىڭ ماڭىزدىلىعى تۋرالى ەسكەرتتى. ال قىتاي تاراپى بۇل ماسەلەگە قاتىستى مالىمدەمە جاساعان جوق. وسىعان دەيىن ەكى كومپانيا دا تىڭشىلىققا قاتىستى ايىپتاردى جوققا شىعارعان.

ايتا كەتەر ءبىر جايت، 6 جەلتوقساندا «Huawei» كومپانياسى باسشىسىنىڭ قىزى جانە قارجى ديرەكتورى مىڭ ۆانجوۋ ۋاشينگتوننىڭ سۇراۋى بويىنشا كانادا مەملەكەتىندە تۇتقىندالعان. مىڭ ۆانجوۋ امەريكانىڭ يران ەلىنە سالعان ساۋدا سانكتسياسىن ورىنداماعانى ءۇشىن قاماۋعا الىندى. بۇل ءىستى قاراعان نيۋ-يوركتەگى شىعىس وكرۋگ سوتى كومپانيانىڭ تىڭشىلىق ارەكەتتەرى دالەلدەنگەن سوڭ، «Huawei»-مەن جاسالعان شەتەلدىك كەلىسىمشارت بۇزىلاتىنىن ايتتى.

 "The Qazaq Times"