Foto: silkroadnews.org

AQŞ prezidenti Donal'd Tramp amerikalıq kompaniyalarğa qıtaylıq «ZTE» jäne «Huawei» qwrılğıların satıp aluğa jäne qoldanuğa tıyım salmaq.

Reuters agenttiginiñ habarlauınşa, Aq üy basşısınıñ osı mäselege qatıstı jarlığı qañtarda jariyalanadı. Qwjatta qıtaylıq qwrılğılar «eldiñ wlttıq qauipsizdigine nwqsan keltiredi» dep körsetiledi. Resmi Uaşington atalğan kompaniyalar Qıtay ükimetine jwmıs isteytinin jäne qwraldarına tıñşılıq üşin jasırın qondırğılar ornatqanın ayttı.

AQŞ qıtaylıq iri tehnologiya kompaniyası sanalatın «Huawei» qwrılğıların qaraşada qatañ tekseruden ötkizgen bolatın. Amerika barlau qızmetkerleriniñ aytuınşa, «Huawei», «ZTE» sındı tehnologiya kompaniyaları Qıtay ükimetiniñ şetelderdegi tıñşılıq mümkindikterin arttıradı. AQŞ ükimeti lauazımdılarınıñ «Huawei» jabdıqtarın keñinen paydalanatın odaqtas elderdegi memleket qızmetkerlerimen jäne telekommunikaciya salasınıñ basşılarımen tığız baylanıs ornatıp otırğanın ayttı. Sonday-aq, olarğa jeli qauipsizdiginiñ mañızdılığı turalı eskertti. Al Qıtay tarapı bwl mäselege qatıstı mälimdeme jasağan joq. Osığan deyin eki kompaniya da tıñşılıqqa qatıstı ayıptardı joqqa şığarğan.

Ayta keter bir jayt, 6 jeltoqsanda «Huawei» kompaniyası basşısınıñ qızı jäne qarjı direktorı Mıñ Vanjou Uaşingtonnıñ swrauı boyınşa Kanada memleketinde twtqındalğan. Mıñ Vanjou Amerikanıñ Iran eline salğan sauda sankciyasın orındamağanı üşin qamauğa alındı. Bwl isti qarağan N'yu-Yorktegi Şığıs okrug sotı kompaniyanıñ tıñşılıq äreketteri däleldengen soñ, «Huawei»-men jasalğan şeteldik kelisimşart bwzılatının ayttı.

 "The Qazaq Times"