فوتو: نسن

رەسەيدە جۇمىس ىستەپ جۇرگەن 345 مىڭ تاجىك ميگرانتىنىڭ تاعدىرى بەلگىسىز. وسىلاي دەپ 25 جەلتوقساندا تاجىك پارلامەنتىنىڭ جوعارعى پالاتاسىنىڭ سپيكەرى ماحمادسايد ۋبايدۋللوەۆ مالىمدەدى.

ونىڭ سوزىنشە، ولاردىڭ ءبارى رەسەيدە زاڭسىز جۇرگەن بولۋى مۇمكىن. "ولاردىڭ كوبى نە ميگراتسيالىق راقىمشىلىققا ىلىنگەن ەمەس، نە دەپورتاتسيالانعان ەمەس. اراسىندا رەسەي ازاماتتىعىن الىپ، بىراق تاجىك بيلىگىنە حابار بەرمەگەندەرى دە بولۋى مۇمكىن", - دەدى سپيكەر.

ماحمادسايد ۋبايدۋللوەۆ رەسمي مالىمەتتەرگە سۇيەنىپ، تاجىكستاننىڭ 226 مىڭ ازاماتىنا رەسەيگە كىرۋگە تىيىم سالىنعانىن ايتتى. "قازىر مەملەكەتتىك دۋمادا ازاماتتارىمىزعا ميگراتسيالىق راقىمشىلىق بەرۋ ماسەلەسى قارالىپ جاتىر", - دەدى ول.

​ميگراتسيا بويىنشا ساراپشى راحمون ۋلماسوۆ «تاجىكستاندىقتاردىڭ كوبى پاتەنت قىمباتتاپ كەتكەن سوڭ، زاڭسىز جۇمىس ىستەۋگە ءماجبۇر» دەيدى. جاڭا جىلدان باستاپ رەسەيدە پاتەنت باعاسى تاعى دا قىمباتتاپ، 5 مىڭ رۋبل بولماق.

رەسمي مالىمەت بويىنشا، رەسەيدە تاجىكستانىڭ ءبىر ملن ازاماتى جۇمىس ىستەپ ءجۇر. 2017 جىلدىڭ قورىتىندىسى بويىنشا رەسەيدىڭ ورتالىق بانكتى تاجىكستانعا اۋدارىلعان قارجى كولەمى 2 ملرد 536 ملن دوللار بولعانىن مالىمدەگەن. بۇل 2016 جىلمەن سالىستىرعاندا 600 ملن دوللارعا كوپ.

"The Qazaq Times"