فرانتسيا پرەزيدەنتى ەممانۋەل ماكرون. فوتو: www.sb.by

فرانتسيادا قاقتىعىس ۇيىمداستىرىپ، ەرەۋىلگە شىققاندارعا ەندى قاتاڭ جازا قولدانىلادى.

ەل پرەزيدەنتى ەممانۋەل ماكرون وسىنداي مالىمدەمە جاسادى. ول ءوز سوزىندە: «ەلدەگى ورىن الىپ جاتقان جاعدايلاردى ىشكى ىستەر مينيسترلىگى قاداعالاپ، كۇن سايىن حاباردار ەتىپ وتىر. ارانداتۋشىلار مەن قۇقىق بۇزعاندار زاڭ الدىندا جاۋاپ بەرەدى. ءبىزدىڭ مەملەكەتىمىزگە بەيبىتشىلىك پەن ىنتىماق قاجەت. بۇلاي جالعاسا بەرسە، فرانتسيا بەيبىتشىلىگىنە نۇقسان كەلەدى»، – دەدى.

ايتا كەتەيىك، وسى اپتا فرانتسياداعى نارازىلىق شەرۋى قايتا باستالىپ، 24 مىڭعا جۋىق ادام بيلىك ساياساتىنا قارسى ەرەۋىلگە شىققان. پاريج ورتالىعىنا جينالعان مىڭعا جۋىق ادام ەل پرەزيدەنتى ەممانۋەل ماكرون زەينەتاقى مەن سالىق جۇيەسىنە قاتىستى ۋادەسىن ورىنداماي وتىر دەيدى. شەرۋدىڭ ارتى قاقتىعىسقا ۇلاسىپ، ەكى جۇزدەن استام ادام قاماۋعا الىندى. فرانتسيالىق «لە موند» باسىلىمىنىڭ جازۋىنشا، ەل كولەمىندە شەرۋگە قاتىسۋشىلاردىڭ سانى 40 مىڭنان اسقان.

"The Qazaq Times"