فوتو: wp-content

فرانتسيا ءتارتىپ ساقشىلارى ەرەۋىلگە شىقتى.

جۇزگە جۋىق ءتارتىپ ساقشىلارى بيلىكتەن جۇمىس جاعدايىن جاقسارتىپ، ايلىقتىڭ ءوسۋىن تالاپ ەتكەن. نارازىلىق شاراسى جاپپاي شەرۋگە ۇلاسپاس ءۇشىن فرانتسيا ىشكى ىستەر مينيسترلىگى قىزمەتكەرلەردىڭ جالاقىسىن ارتتىرۋعا كەلىستى. الداعى ۋاقىتتا قارجىلاندىرۋ زاڭىنا وزگەرىستەر ەنگىزىلمەك.

سوڭعى جىلدارى فرانتسيادا حالىق نارازىلىعى ءجيى ورىن الىپ كەلەدى. بيىل قازاندا ەل پرەزيدەنتى ەممانۋەل ماكروننىڭ زەينەتاقى رەفورماسىنا نارازىلىق بىلدىرگەن مىڭداعان زەينەتكەر پاريج ماڭىندا ەرەۋىل ۇيىمداستىرعان بولاتىن. زەينەتكەرلەر جالاقى مەن زەينەتاقىعا سالىناتىن سالىقتىڭ وسۋىنە قارسىلىق ءبىلدىردى. ال جەلتوقساننىڭ باسىندا «سارى جەيدەلىلەر» ەرەۋىلى باستالدى. بۇل شارا دانارماي اكتسيزىن كوتەرۋگە بايلانىستى ۇيىمداستىرىلدى. العاشقى كەزدە جانارمايعا سالىقتى وسىرۋگە قارسى بولعان شەرۋشىلەر ەندى ۇكىمەتتىڭ وتستاۆكاعا كەتۋىن تالاپ ەتتى.

فوتو: cdn

حالىق تولقۋىن باسۋ ءۇشىن فرانتسيا ۇكىمەتى جانارماي سالىعىن الداعى جىلدارى كوتەرمەيتىنىن ايتقان بولاتىن. وسىعان بايلانىستى فرانتسيا پرەزيدەنتى ەممانۋەل ماكرون سالىقتى وسىرۋگە 6 ايعا دەيىن شەكتەۋ ەنگىزىپ، گاز بەن ەلەكتر ەنەرگياسى باعاسىن وسىرۋگە دە ۋاقىتشا تىيىم سالۋ تۋرالى شەشىم شىعاردى. سونداي-اق ماكرون 2019 جىلدان باستاپ فرانتسيا ەكونوميكاسى بۇرىنعىدان نىعايىپ، جۇمىس بەرۋشىلەرگە جىل سوڭىندا قىزمەتكەرلەرىگە سىياقى تولەۋدى مىندەتتەپ، زەينەتكەرلەر مەن ازاماتتارعا قوسىمشا تابىس سالىعىن الىپ تاستايتىنىن مالىمدەدى. تەلەكوپىر ارقىلى حالىققا تىكەلەي ۇندەۋ جولداعان ماكرون قازىرگى جاعدايدىڭ ەندى قايتالانبايتىنىنا، بيلىك حالىقتىڭ مۇڭ-مۇقتاجىنا بەي-جاي قارامايتىنىن دا ايتتى. الايدا، سارىلار بۇل شەشىمگە تاعى دا قارسىلىق ءبىلدىرىپ، كەزەكتى مارتە اۋقىمدى شەرۋ ۇيىمداستىردى. ءبىر ايعا سوزىلعان ەرەۋىل ەل قازىناسىنا كوپ مولشەردە شىعىن اكەلىپ، تۋريستەردىڭ لەگى باسەڭدەگەن. فرانتسيا ۇكىمەتىنىڭ اقپاراتى بويىنشا، جالپى ەل كولەمىندە شەرۋگە قاتىسۋشىلاردىڭ سانى 36 مىڭ ادامعا جەتكەن.

"The Qazaq Times"