26 قازان كۇنگى الماتى قالاسى، بالۋان شولاق اتىندىعى سپورت سارايىندا «Qazaq Promotions» پروموۋتەرلىك كومپانياسىنىڭ ۇيىمداستىرۋىمەن وتكەن بوكس كەشىنىڭ باستى كەيىپكەرى ۇلى دالا ەلىنىڭ باتىرى قانات يسلام (26-0, 21 كو) مەن ناميبيالىق بوكسشى ۆالتەر كاۋتوندوكۆا (18-1, 17 كو) اراسىنداعى تارتىستى 10 راۋندتىق جەكپە-جەكتە وتانداسىمىز WBO حالىقارالىق چەمپيونىنىڭ بەلبەۋىن قورعاپ، جەڭىسكە قول جەتكىزدى.

دەگەنمەن دە، جان كۇيەرلەر مەن اعايىنداردىڭ اتالىمىش كەش اياسىندا الەۋمەتتىك جەلىدە قاناتقا قاراتا سىني كوز قاراستار مەن ونى وزەككە تەبەر جازبالار، الىپ قاشپا دالەلسىز اقپاراتتار قاپتاپ كەتتى. قاناتتىڭ جەكە باسىنا پىكىر ايتىپ عانا قويماي، وسى بوكس كەشىن مەملەكەتتىك ساياسي ويىنعا بالاپ، قازاق باتىرىن لەزدە قارالاپ شىعا كەلدى. ولاردىڭ پايىمداۋىنشا: – «قانات يسلام وزىنەن رەيتينگ كورسەتكىشى تومەن بوكسشىمەن جۇدىرىقتاسادى»، «بوكس امەريكادا تۋىپ، قازاقستاندا ءولدى»، «قانات جەكپە-جەك سوڭىنا قاراي، تەك قورعانۋمەن عانا بولدى» – دەگەن قيسىنسىز پىكىرلەر جازىلدى، وعان جاۋاپ مىنە https://abai.kz/post/99805. بۇدان دا سوراقىسى، «بوكس كەشىنەن كەيىن قانات قاستاندىققا ۇشىرادى»، «قانات قىتاي بوكسشىسى ەكەن»، «جەكپە-جەك ءادىل ەمەس»، «نۇر وتان جەڭدى»، – دەگەن سياقتى قاۋەسەكتى ىرىتكى سالۋشىلار ودان ءارى قىزدىرا ءتۇستى. قاراپ وتىرساڭ وسىنىڭ ءبارىن جازىپ جاتقان ءوز قازاعىڭ. سىرتتان كەلىپ تۇرتەكتەپ جاتقان ەشكىم جوق. بوكس كەشى اياقتالماي، جەكپە-جەكتىڭ بارىسى تۋرالى ناقتى اقپارات شىقپاستان، جارىسا جازىپ تاراتىپ جاتتى. تارتىستى دودادان سوڭ، «Qazaq Promotions» پروموۋتەرلىك كومپانياسى قاناتتىڭ 6 راۋندتان سوڭ قورعانىس تاكتيكاسىن تۇسىندىرە «قاناتتىڭ قولىنىڭ سىنىپ، 4 راۋند بويى سىنعان قولمەن بوكستاسىپ شىققانى» تۋرالى اقپارات تاراتقان بولاتىن. ەندەشە، انىقتالماعان اقپارات تاراتىپ، عايبات ايتىپ جاتقاندارعا:
بىرىنشىدەن: قانات رينگتە قارسىلاسىن ءبىر رەت نوكداۋنتقا ءتۇسىرىپ، قولى سىنسا دا، شابۋلعا توسقى بەرە وتىرىپ، شاپشاڭ قيمىلداپ، وزىنە جۇدىرىق دارىتپاي قايسارلىقپەن ءوز مىندەتىن جاقسى اتقارىپ شىقتى. ونىڭ ءوزى ەرلىك رەتىندە جىرعىپ ايتۋعا تۇرارلىق. سونىمەن قاتار، ۆالتەر كاۋتوندوكۆانىڭ نوكداۋنتقا ءتۇسىپ 7-8 ساناعاندا تۇرۋىنىڭ ءوزى، قانات ءۇشىن ەڭبەگىنىڭ ۇلكەن جەتىستىگى. وسىنىڭ ءبارىن باقىلاپ وتىرعان تورەشىلەر ءادىل ۇپايلارىن بەردى.

ەكىنشىدەن: قىتاي كونسۋل باسشىسىنىڭ قاناتتىڭ قولىن ۇستاپ كەتۋ ءۇشىن رينگكە شىعۋى زاڭدىلىق. ويتكەنى قىتاي ەلى سان عاسىرلىق كورشىمىز، ەكى ەل اراسىندا مەملەكەت ارالىق كەلىسپەۋشىلىك بولعان ەمەس. قىتاي ەلىنىڭ وكىلەتتى ادامى بولعان سوڭ ءوزى كەلىپ قانات سىندى الەمدىك دارەجەدەگى بوكسشىنىڭ قولىن ۇستاۋ ابەستىك ەمەس. ءارى قاناتتىڭ ونىڭ ىقىلاسىن قابىل الىپ، جىگىتتىك مىنەز كورسەتكەنىندە تۇرعان دانەڭە جوق. «مۇسىلمانداردىڭ كوركەم مىنەز-قۇلقىن (احلاقىن), ابىرويىن بارلىق جەردە بارلىق ادامدارعا كورسەتىپ ءجۇرۋ كەرەك. ءار حالىقتىڭ ساناسىندا يسلام دىنىنە دەگەن سۇيىسپەنشىلىكتى وياتىپ، يسلام دىنىنە قۇرمەت كورسەتۋگە سەبەپكەر بولۋ كەرەك» (يسلام احلاقى) – دەلىنگەن. قازاقتا «دۇشپانىڭ، جاقسى كورمەيتىن ادامىڭ بولسادا سالەمدەس، قول بەرۋ كەرەك» – دەلىنگەن. ال، قۇراندا «فۋسيليات» سۇرەسىنىڭ 34-ءشى اياتىندا: «جاقسىلىق پەن جاماندىق تەڭ ەمەس، جاماندىقتى ەڭ كوركەم تۇردە جولعا سال. (جاماندىققا قارسى جاقسىلىق قىل)» – دەلىنگەن. دەمەك، اتالى سوزبەن، حاق ءدىنىمىزدىڭ پايىمداۋلارىنا سۇيەنەر بولساق، قاناتتىڭ قىتاي كونسۋل باسشىسىنىڭ قولىن الماي نەمەسە باسقاشا مىنەز كورسەتۋىنىڭ قاجەتتىلىگى شامالى. مەيلى قانداي بولماسىن قۇتتىقتاۋىن قابىلداۋ، قاناتتىڭ بىلىمدىلىگى مەن كورەگەندىگى، قانداي ورتادا بولسا دا ءوزىن سانالى ۇستايتىندىعىن الەم الدىندا تاعى ءبىر رەت پاش ەتتى. قول ۇستاسىپ، سۋرەتكە تۇسكەنىنە بولا، استارىنان ساياسي ويىن ىزدەپ، تىمىسكىلەۋدىڭ، قارالاۋدىڭ كەرەگى جوق. قىتايداعى قازاق ماسەلەسىن بوكسشى رەتىندە قانات كوتەرۋگە ءتيىستى ەمەس. زاڭدى ورگانىمىز، الپاۋىت مەملەكەتىمىز بار ەلمىز. سوندىقتان، قانات پەن قىتاي كونسۋل باسشىسىنىڭ بىرنەشە رەتكى كەزدەسۋى مەن سۋرەتتەرىنەن «ساتقىندىق» ىزدەپ سابىلۋدىڭ ءوزى اقىماقتىق.
ۇشىنشىدەن: قىتايدىڭ كونسۋل باسشىسىن «نۇر وتان» قوناققا شىقىرىپ، ءىس-شارانى مەملەكەت ارنايى قارجى ءبولىپ ۇيىمداستىرىپ وتىرعان جوق. كونسۋل باسشىسىنىڭ قاي جەرلەرگە بارۋعا بولاتىنى تۋرالى ءوزىنىڭ نورماتيۆتىك قۇقىقتارى بار. سونىڭ اياسىندا قاناتقا جان كۇيەر بولۋ ماقساتىندا كەلگەندىگى داۋسىز. بۇل، كونسۋل باسشىسىنىڭ جەكە تۇلعالىق ءىسى. الەمدىك بوكس كەشى بولعاندىقتان باسقادا شەتەلدەن كەلىپ جاتقان قوناقتار جەتەرلىك، ونى مەمەلەكەتتىك كەزدەسۋلەرمەن شاتاستىرماۋ كەرەك.

تورتىنشىدەن: «نۇر وتان جەڭدى» – دەپ، استارلاپ قانات يسلامنىڭ «نۇر وتان» پارتياسىنىڭ وكىلى ەكەندىگىن، سونىڭ ارقاسىندا ۇكىمەت پارمەنىمەن جەڭدى – دەگىزىپ، جەكپە-جەكتىڭ جەڭىسىمەن بايلانىستىرىپ، «ايدى اسپانعا شىعارماقشى» – بولدى. بىراق، كورەرمەن كۋا، زالدا «نۇر وتان» پارتياسىنىڭ جالاۋى نەمەسە وعان بايلانىستى ۇندەۋلەر مەن قانداي دا ءبىر بەلگىلەر، نەمەسە ارنايى وكىلەتتى لاۋازىمدى تۇلعا جوق. ال، قالا اكىمى باقىتجان ساعىنتاەۆتىڭ قاتىسۋى ازاماتتىق تۇلعاسىندا.

قىسقاسىن ايتقاندا، قانات يسلام جەڭدى. «ادىلەتسىزدىك» ت.ب. سوزدەردى ايتپاس بۇرىن، تولىقتاي زەرتتەپ-زەردەلەپ الىپ، ناقتى فاكت پەن اقپارات بەرۋ كەرەك. قاناتتىڭ جەڭىسى قازاق ەلىنە ورتاق، قولداپ قۋاتتاپ جاتقاندار، ىرتكى سالىپ، كۇندەستىكپەن نەمەسە «شىنشىل» سىنىپ، ءتىسىن قايراپ، ءوز ۇلىن وزەككە تەۋىپ جۇرگەندەردەن الدە قايدا كوپ. قيىندىقتا «تاقىمىن قىسىپ» قولداعان بەرەكەلى اعايىنعا العىسىم شەكسىز. ال، الدە بولسا «باس سىنسا بورىك ىشىندە، قول سىنسا جەڭ ىشىندە» – دەگىزىپ، ءبىر قانداسىنىڭ باسىنا ءسال قيىندىق تۇسكەندە، رۋحتاس بولا الماي جۇرگەندەرگە س.سارايننىڭ «قايدا ناعىز ونەر يەسى بولسا، كۇنشىل سونى كۇندەيدى» – دەگەندى ايتقىم كەلەدى. ارى قاراي «تىرناق استىنان كىر ىزدەۋدىڭ» قاجەتى جوق. قادىرمەندى حالقىم، ارقاشان دا ءبىر-ءبىرىمىزدى قولداپ، بەرەكەدە بولايىق. بوكس كەشىن ساياساتقا اينالدىرمايىق، اعايىن!

 

نۇربازار جاڭگىرتەگى

“The Qazaq Times”