قازاقستان بيلىگىنە ءموبيلدى قۇرىلعىلاردى تىركەۋدىڭ قاجەتى قانشا؟

2019 جىلدىڭ 1 قاڭتارىنان باستاپ رەسپۋبليكا بويىنشا تىركەۋدەن وتپەگەن ۇيالى تەلەفوندار مەن پلانشەتتەر قىزمەت اياسىنان تىس قالادى. اقپارات جانە كوممۋنيكاتسيا مينيسترلىگىنىڭ جارلىعىنا سايكەس، قازاقستاندىقتار 1 قاڭتارعا دەيىن ۇيالى تەلەفوندارىنىڭ IمEI-كودىن جسن نەمەسە بسن نومەرىنە تىركەۋى ءتيىس.

اقپارات جانە كوممۋنيكاتسيا ءمينيسترى داۋرەن اباەۆتىڭ سوزىنشە، بۇل قازاقستاندىقتاردىڭ قاۋىپسىزدىگى ءۇشىن جاسالىپ جاتقان جۇمىستار.

«IمEI-كود ءموبيلدى قۇرىلعىنىڭ يەسىن انىقتاۋعا مۇمكىندىك بەرمەيدى. سەبەبى نارىقتا IمEI-كودى بىردەي ءموبيلدى قۇرىلعىلار كوپتەپ كەزدەسەدى. بۇل ماسەلەدەن شىعۋدىڭ ءبىر جولى IمEI-كودتى قۇرىلعى يەسىنىڭ جسن نومەرىنە نەمەسە ابونەنتتىك نومىرىنە تىركەۋ. ەگەر IمEI-كود تىركەلەتىن بولسا، وندا تەلەفون ۇرلاۋدىڭ ەشقانداي قيسىنى بولمايدى» - دەپ مالىمدەدى اباەۆ مىرزا.

بىراق كوپتەگەن ساراپشىلار بيلىكتىڭ بۇل باستاماسىنىڭ ءتيىمدى جۇمىس ىتەۋى ەكىتالاي دەپ ەسەپتەيدى. ولاردىڭ سوزىنشە، ۇيالى تەلەفونداردىڭ IمEI-كودىن تىركەۋ 2014 جىلى جاسالعان ۇيالى بايلانىس نومىرلەرىن تىركەۋدەن وتكىزۋدىڭ اياعىن قۇشادى.

«2014 جىلعى ءنومىر تىركەۋ باستاماسى ەشقانداي ناتيجە بەرمەدى. شىن مانىسىندە ول ۋاقىتتا ەشكىم ءنومىر تىركەگەن جوق. تەكسەرۋ بارىسىندا ءبىر ادامنىڭ اتىنا بىرنەشە ءنومىردىڭ تىركەلگەنى انىقتالدى. ءوز باسىم تەرروريستەر مەن ەكسترەميستەر ۇيالى تەلەفوندارىنىڭ IمEI-كودىن ءوز اتتارىنا تىركەپ، ارتىنان ءىس-ارەكەتتەرىن تەلەفون ارقىلى تالقىلايدى دەگەنگە سەنبەيمىن» - دەيدى ساياساتتانۋشى يسلام كۋراەۆ.

جالپى، ەل اراسىندا: «بيلىك ءموبيلدى قۇرىلعىلاردى تىركەۋگە قويۋ ارقىلى حالىقتى باقىلاۋدا ۇستاماق» - دەگەن دە پىكىر بار. قوعام بولعاسىن سان ءتۇرلى پىكىردىڭ بولۋى زاڭدىلىق. بىراق بيلىكتىڭ سوڭعى ۋاقىتتاعى «تەلەفون ءنومىرىن تىركەۋ»، «توتەنشە جاعدايلاردا عالامتوردى بۇعاتتاۋ»  دەگەن سياقتى باستامالارى ەرىكسىز جوعارىدا ايتىلعان ويعا جەتەلەيدى.

"The Qazaq Times"