سوڭعى ۋاقىتتا اقش-تىڭ سالعان تولاسسىز سانكتسيالارىنان كەيىن يران بيلىگى دە ىسكە كىرىسكەن سىڭايلى. وسى ۋاقىتقا دەيىن « قانداي سانكتسيا بولماسىن، توتەپ بەرەمىز» دەگەننەن باسقا ماردىمدى جاۋاپ قاتپاعان يران بيلىگى وزدەرىنە كەلگەن قىسىمنىڭ باستاماسىن سەزگەندەي. سەبەبى، يران كوشباسشىسى حاسان رۋحاني «امەريكا قۇراما شتاتىنىڭ سانكتسيالارى جالعاسا بەرسە، ورمۋز بۇعازى ارقىلى وتەتىن شيكى مۇناي تاسمالىنا توسقاۋىل قويامىز» دەپ مالىمدەمە جاسادى.

نەگىزىنەن ورمۋز بۇعازى يران ەلىنىڭ ستراتەگيالىق جانە ترانزيتتىك ماڭىزى زور اۋماقتارىنىڭ ءبىرى. سونىمەن قاتار، اتالعان بۇعاز ارقىلى پارسى شىعاناعىنداعى مۇناي ءوندىرۋشى ەلدەر وزدەرىنىڭ شيكى ونىمدەرىن ەركىن تاسمالداۋىن جالعاستىرىپ كەلەدى. ءتىپتى بۇل وڭىردەن الىناتىن قارا التىن جالپى كولەمنىڭ 20 پايىزىنان اسادى ەكەن. وسىعان بايلانىستى كوپتەگەن حالىقارالىق ساراپشىلار اتالعان ورىندى «يران بيلىگىنىڭ كوزىرى» دەپ اتايدى.

ەگەر ءرۋحانيدىڭ ءسوزى ىسكە اسار بولسا، وندا اقش تاراپى كۇش قولدانۋعا دا بارۋى مۇمكىن. سەبەبى، ءدال وسى جاعداي 1980-1988 جىلدارداعى يران مەن يراك اراسىنداعى سوعىستىڭ باستاماسىنا ۇقساپ بارادى. تەڭىز جولىندا باستالعان سوعىس كەزىندە ورمۋز بۇعازى ارقىلى قاتىنايتىن كەمەلەردىڭ ەركىن قاتىناۋىنا قيىندىق تۋعىزعان بولاتىن. ءدال وسى جاعدايدى پايدالانعان امەريكا بيلىگى ءوز اسكەرىن كىرگىزىپ، ءالى كۇنگە دەيىن شىعارماي وتىر. بىراق، اتالعان ورىندا اقش-تىڭ ەشقانداي مەنشىكتى جەرى بولماعاندىقتان، اسكەري-تەڭىز كۇشىن الىپ تاستاۋ تۋرالى مالىمدەمەنى  يران وسى ۋاقىتقا دەيىن ايتىپ وتىر.

ەستەرىڭىزگە سالا كەتەيىك، شىلدە ايىنىڭ باسىندا حاسان رۋحاني ءدال وسى ورمۋز بۇعازىن بۇعاتتاۋ تۋرالى مالىمدەگەن بولاتىن. بىراق، وسى ۋاقىتقا دەيىن ءبىر ناتيجە شىقپاعاندىقتان، اقش تاراپى ءوز سانكتسيالارىن سالۋدى جالعاستىرعان. ەكىنشى رەت كوتەرىلىپ وتىرعان ورمۋز بۇعازىنىڭ جاعدايى پارسى شىعاناعىنداعى مۇناي ءوندىرۋشى ەلدەردى ەندى الاڭداتاتىنى بەلگىلى.

“The Qazaq Times”