رەسەي مەن بەلارۋسسيانىڭ بىرنەشە ونىمدەرى قازاقستاننىڭ نارىعىنان الىنادى

قازاقستاننىڭ ساۋدا نارىعىنان رەسەي مەن بەلارۋسسيانىڭ تاۋىق ەتى جانە بىرنەشە كاسىپورىنداردىڭ تاۋارلارىن الىپ تاستايدى. بۇل تۋرالى دەنساۋلىق ساقتاۋ مينيسترلىگى مالىمدەپ وتىر.

«ماگنيتوگور قۇس ءوسىرۋ كەشەنى» مەن «برويلەر ءوندىرىسى» فابريكالارىنىڭ ونىمدەرى جاپپاي دۇكەندەردەن الىنادى. سەبەبى، تەكسەرىس كەزىندە ءونىم قۇرامىنان سالمونەللا باكتەرياسى بار ەكەندىگى انىقتالعان. سونىمەن قاتار، قازاقستاندىق ماماندار تاۋىق ەتىنىڭ ميكروبيولوگيالىق قۇرامى دا سايكەس كەلمەيتىندىگىن تاپتى. بۇدان بولەك،  بەلارۋسسيالىق «سمولەۆيچ برويلەر»، «ناتۋرالنىي» جانە «سپك كۋرنيكوۆ» كومپانيالارىنىڭ ونىمدەرى دە ءبىزدىڭ نارىققا ساي ەمەس ەكەندىگىن مالىمدەدى. قازىرگى تاڭدا بارلىق جاعدايدى باقىلاۋدا ۇستاپ،  اكىمشىلىك جازا قولدانۋ تۋرالى جۇمىستار جۇرگىزىلۋدە.

ەستەرىڭىزگە سالا كەتەيىك، قوعامدىق دەنساۋلىق ساقتاۋ كوميتەتى قازان ايىندا رەسەي كاسىپورىندارىنىڭ بىرنەشە ساپاسىز تاۋارلارىن ىشكى نارىقتان الىپ تاستاعان. ەندى ونىڭ قۇرامى تاعى دا ۇلعايۋدا.

سوڭعى ۋاقىتتا رەسەي اۋىلشارۋاشىلىق ورىنى مەن قازاقستاننىڭ اۋىلشارۋاشىلىق مينيسترلىگىنىڭ اراسىندا بىرنەشە تەكە-تىرەستىڭ بولعاندىعى بەلگىلى. ءتىپتى، رەسەي قازاقستاننىڭ ءسۇت، بالىق، شۇجىق سىندى ونىمدەرىنە توسقاۋىل قويىپ، جەمىس جيدەكتىڭ ساپاسىنا دا قاتتى كوڭىل بولگەن. وسىنىڭ سالدارىنان كەدەندىك باقىلاۋ بەكەتىنىڭ ماڭىنان بىرنەشە تاۋارعا توسقاۋىل قويىپ شەكارادان اسىرماعان بولاتىن. ەندى، قازاقستان تاراپى دا بۇل ىسكە بىلەك سىبانا كىرىسكەن سىڭايلى.

“The Qazaq Times”