دانيال احمەتوۆ ىسساپارمەن شىڭجاڭ ۇيعىر اۆتونوميالىق اۋدانىنا باردى

شىعىس قازاقستان وبلىسىنىڭ اكىمى دانيال احمەتوۆ رەسمي ىسساپارمەن قىتايدىڭ شىڭجاڭ ۇيعىر اۆتونوميالىق اۋدانىنا باردى.

ءىسساپار بارىسىندا دانيال احمەتوۆ شىڭجاڭ ۇيعىر اۆتونوميالىق اۋدانىنىڭ باسشىسى شوحرات زاكيرمەن ەكىجاقتىق كەزدەسۋ وتكىزدى. قوس تاراپ شىعىس قازاقستان مەن شىڭجاڭ اۋدانى اراسىنداعى ساۋدا-ەكونوميكالىق، اۋىلشارۋاشىلىق، مەديتسينا، ءبىلىم جانە تەمىر جول سالالارىن ودان ارى دامىتۋعا بايلانىستى كەلىسسوزدەر جۇرگىزدى.

شىعىس قازاقستان وبلىسى وكىلدەرى وسىعان دەيىن قىتاي تاراپىمەن سوڭعى 4 جىلدا ءار ءتۇرلى دەڭگەيدە 15 كەزدەسۋ وتكىزگەن.

وسى تۇستا ايتا كەتەتىن ءبىر جايت، سوڭعى ۋاقىتتارى باق بەتتەرىندە «جەرگىلىكتى بيلىك قىتايداعى ەتنيكالىق قازاقتاردى قۋدالاپ، ءماجبۇرلى تۇردە ساياسي ۇيرەنۋ لاگەرلەرىنە جىبەرۋدە» دەگەن اقپاراتتار تاراۋدا. وسىعان بايلانىستى بىلتىر استانادا وتكەن دۇنيەجۇزى قازاقتارىنىڭ V قۇرىلتايىندا گەرمانيادان كەلگەن ەتنيكالىق قازاق ءومىرحان التىن پرەزيدەنت نۇرسۇلتان نازارباەۆتىڭ الدىندا مالىمدەمە جاساعان. كەيىننەن مەملەكەت باسشىسى ءسىم مەن قۇزىرلى ورگاندارعا اتالمىش ماسەلەگە مەملەكەتتىك دەڭگەيدە ارالاسۋعا تاپسىرما بەرگەن. بىراق سول ۋاقىتتان بەرى قىتاي تاراپى قازاقستان ءسىم جىبەرگەن نوتالارعا ماردىمدى جاۋاپ قاتپاي كەلەدى.

"The Qazaq Times"