ۇلىبريتانيا پرەمەر-ءمينيسترى تەرەزا مەي. فوتو: rbk.ru

ۇلىبريتانيانىڭ Brexit جوسپارىنا ەۋروپالىق وداق ەلدەرىنىڭ ورتاق ىستەر بويىنشا مينيسترلەر كەڭەسى قولداۋ ءبىلدىردى.

ەۋرووداقتىڭ باستى وكىلى ميشەل بارنە بريتانيانىڭ وداق قۇرامىنان شىعۋ تۋرالى جوسپارى جوعارى دەڭگەيدە جانە ۇيلەسىمدى جوسپارلانعانىن ايتتى. ءوز مالىمدەمەسىندە ول: «ەۋرووداققا مۇشە ەلدەردىڭ مينيسترلەرى ۇلىبريتانيانىڭ ءبولىنۋى تۋرالى جوباسىن جانە وسى ەلمەن بولاشاق قارىم-قاتىناس تۋرالى ساياسي قاراردى ماقۇلدادى. سونىمەن قاتار، يرلانديا جانە سولتۇستىك يرلانديا اراسىندا قاتال شەكارا ءتارتىبىن ەنگىزبەۋ ءۇشىن ىمىراعا كەلدىك»، – دەدى. مينيسترلەر كەڭەسى وڭ پىكىر بىلدىرگەن سوڭ، قۇجات ەۋروپارلامەنت پەن ۇلىبريتانيا پارلامەنتىنە جىبەرىلدى. ەندى 25 قاراشادا ەۋرووداقتىڭ كەزەكتەن تىس ءسامميتى كەزىندە پرەمەر-مينيستر تەرەزا مەيدىڭ جوسپارى شەشىمىن تابادى.

اۋستريانىڭ ەو ىستەرى بويىنشا ءمينيسترى گەرنوت بليۋمەل: «بريتانيانىڭ ەۋرووداقتان شىعۋىنىڭ بارلىق تۇسى بويىنشا كەلىسىمىگە كەلدىك. ونىڭ اراسىندا ەۋروپالىق جانە بريتان ازاماتتارىنىڭ قۇقىقتارى مەن قاۋىپسىزدىك ماسەلەلەرى دە قاراستىرىلادى. مىسالى، باسقارۋ جۇيەسى، قارجىلىق ەسەپ، شەكارالىق ماسەلە، گەوگرافيالىق بەلگىلەردى دە تالقىلادىق. ەكى تاراپ تا وسى باعىتتا ءوزارا قادام جاسادى. بارلىعى وڭ شەشىمىن تاباتىنىنا سەنەمىن»، – دەدى. ال يرلانديانىڭ سىرتقى ىستەر ءمينيسترى سايمون كوۆني: «بريتانيانىڭ مينيسترلەرىمەن كەزدەسىپ، ءبىراز ماسەلەلەردى تالقىلادىق. ءبىزدىڭ تاراپتىڭ ويىنشا، بىرىككەن كورولدىكتىڭ وداق قۇرامىنان شىعۋ كەلىسىمى وسى ايدا بەكىتىلگەنى دۇرىس بولادى»، – دەگەن پىكىر ءبىلدىردى.

ايتا كەتەيىك، كەلىسسوزدەر 2017 جىلدان بەرى جالعاسىپ كەلەدى. تاياۋدا مەي ۇكىمەتى Brexit كەلىسىمىنىڭ تولىققاندى دايىن ەكەندىگىن ايتقان. ەندى ۇلىبريتانيانىڭ Brexit جوسپارى كەلەر جىلدىڭ ناۋرىز ايىندا جۇزەگە اسپاق.

"The Qazaq Times"