رەسەيدىڭ ءنوۆوسىبىر وبلىسىنداعى فسب شەكارا قىزمەتكەرلەرى 17 جىل بۇرىن اسكەردەن قاشقان ساربازدى تۇتقىندادى. ۇزاق ۋاقىتتان بەرى قازاقستان ايماعىندا ءومىر سۇرگەن ازاماتقا ۇستالعاننان كەيىن زاڭ بويىنشا ايىپ تاعىلدى.

2001 جىلى اسكەري بولىمنەن قاشقان ولەگ ەرمولاەۆ ۇزاق جىلدار بويى قازاقستان ايماعىن مەكەندەگەن. قاراعاندى جانە پاۆلودار وبلىستارىندا فەرمەرلىك شارۋاشىلىق جۇمىستارىندا جۇرگەن سارباز بيىل ەلىنە ورالۋعا بەل بۋعان. وسىلايشا، 36 جاستاعى ازامات رەسەي شەكاراسىن زاڭسىز جولمەن كەسىپ وتپەك بولعان ۋاقىتتا ۇستالدى. ءنوۆوسىبىر اسكەري سوتى ونى ءۇش جىلعا باس بوستاندىعىنان ايىرىپ، 50 مىڭ رۋبل كولەمىندە ايىپپۇل تولەۋگە ۇكىم شىعاردى. بۇگىندە سوتتىڭ شىعارعان شەشىمى تولىقتاي زاڭدى كۇشىنە ەنگەن.

ەستەرىڭىزگە سالا كەتەيىك، 2012 جىلى ۆلاديسلاۆ چەلاح ءوزىنىڭ 15 ارىپتەسىن ءولتىرىپ، تاۋ اراسىنا بىرنەشە كۇن جاسىرىنعان بولاتىن. الايدا، قۇرىقتالعاننان كەيىن ءوزىمدى قورعاۋ ءۇشىن وسىنداي ارەكەتكە باردىم دەپ اقتالعان ەدى.

جىل سايىن ءتۇرلى امالدار تاۋىپ اسكەردەن قاشاتىن ساربازدار ءبىزدىڭ ەلدە دە جەتكىلىكتى.   كەيبىر ساراپشىلار الىمجەتتىك پەن زورلىق-زومبىلىققا شىداي الماعاندار وسىنداي قادامعا كوپتەپ باراتىنىن مالىمدەپ وتىر. وتان الدىنداعى بورىشىن وتەۋگە اتتانعاندار وپاسىزدىقتىڭ كەسىرىنەن نە قاشىپ نەمەسە ءوز-وزىنە قول جۇمساپ، مەرزىمىن اياقتاماي اسكەردى تاستاۋعا بەل بۋىپ جاتادى.

"The Qazaq Times"