سولتۇستىك اتلانتيكالىق كەلىسىم ۇيىمى (ناتو) قىرعي-قاباق سوعىسىنان كەيىن تۇڭعىش رەت اۋقىمدى اسكەري جاتتىعۋ وتكىزبەك.

رەسەيمەن شەكارالاس جەردە وتەتىن جاتتىعۋعا 31 ەلدىڭ اسكەرلەرى قاتىسادى. ناتو باسشىلارى بۇل ارەكەتتىڭ سوعىستى قالامايتىنىن جانە ماسكەۋمەن جانجالداسۋدى ماقسات ەتپەيتىنىن ايتتى. اۋقىمدى شاراعا اۆيا-تاسىمالداۋشى «گارري ترۋمەن»-ءنىڭ 6 مىڭ اسكەرىمەن قاتار جالپى سانى 35 مىڭ جاساق قاتىسادى.

ناتو باس حاتشىسى يەنس ستولتەنبەرگ: «قىرعي-قاباق سوعىس جۇرگىزۋدى قالامايمىز. ءبىزدىڭ ماقسات باسقا. ايماقتاردا وقىس وقيعالاردىڭ الدىن الۋ ءۇشىن  جاۋىنگەرلىك ازىرلىكتىڭ ماڭىزى زور. ال اسكەردىڭ دايىندىعىن شىڭداۋ ءۇشىن وقۋ، جاتتىعۋلاردى ءجيى وتكىزۋ قاجەت. بۇدان كەيىن دە رەسەيمەن قارىم-قاتىناس ۋشىعادى دەپ ويلامايمىن. سول سەبەپتى قيىنشىلىقتارعا قاراماستان، كرەملمەن بىرلەسە جۇمىس ىستەۋ كەرەك»، – دەيدى.

ايتا كەتەيىك، وسىعان دەيىن رەسەي 300 مىڭنان استام جاساق قوسىپ، كولەمدى اسكەري جاتتىعۋىن قىتايمەن شەكارالاس جەردە جۇرگىزگەن بولاتىن. ناتو ەلدەرى رەسەي قارۋلى كۇشتەرىنىڭ بۇل وقۋ-جاتتىعۋ جۇمىستارىنا «ماسكەۋ ۇلكەن سوعىسقا دايىندالۋدا» دەگەن باعا بەرگەن.

"The Qazaq Times"