ءادىل ءال-جۋبەير. فوتو: VOA.

ساۋد ارابياسىنىڭ جوعارى لاۋازىمدىسى اپتا سوڭىندا تاعى دا مالىمدەمە جاساپ، ستامبۋلداعى كونسۋلدىقتا حاشوگگيدىڭ ءولتىرىلۋى ۇلكەن ءارى ەلەۋلى قاتەلىك بولعانىن، ساۋد ۇكىمەتى كىنالىلەردى قاتاڭ جازالايتىنىن ايتتى. بۇل تۋرالى ساۋد ارابيالىق رەسمي اقپارات قۇرالدارى حابارلادى.

ساۋد ارابياسىنىڭ ءسىم باسشىسى ءادىل ءال-جۋبەير جەكسەنبى كۇنى Fox News ارناسىنا بەرگەن سۇحباتىندا، ساۋد ارابيالىق اگەنتتەردىڭ بۇل ءىستى «بيلىك شەگىنەن تىس» جاساعانىن ايتتى. ءارى، بۇل ارەكەتتى ايىپتاي وتىرىپ، حاشوگگيدىڭ وتباسى مەن تۋىس-تۋعاندارىنا كوڭىل ايتتى. دەگەنمەن، حاشوگگيندىڭ قالاي ءولتىرىلدى؟ ونىڭ دەنەسىنىڭ قايدا؟ سونداي-اق، ساۋد ارابياسىنىڭ ناعىز بيلەۋشىسى پاتشا ما، الدە مۇراگەر حانزادا مۇحاممەد بين سالمان با؟ – مىنە بۇل قاتارلى سۇراقتارعا ءال-جۋبەير جاۋاپ بەرمەدى.

جۋرناليست جامال حاشوگگي. فوتو: Fox News

بىراق ول ءوز ۇكىمەتىنىڭ وتكىزگەن قاتەلىكتەرىن اشىق مويىندادى. ول سوزىندە: «بۇل ورەسكەل قاتەلىك. ال قاتەلىكتى جاسىرىپ، ءىستى ءتىپتى دە قيىنداتا ءتۇستى. بۇل كەز-كەلگەن ۇكىمەت ءۇشىن دە قولايسىز جاعداي»، – دەدى.

جۇما كۇنى ساۋد پاتشالىعىنىڭ بيلىگى رەسمي مالىمدەمە تاراتىپ، جۋرناليست حاشوگگيدىڭ ءوز كونسۋلدىعىندا ولگەنىن مويىندادى. ءارى، 59 جاستاعى جامال حاشوگگي اتىس كەزىندە وققا ۇشقانىن ايتتى. بۇل مالىمدەمەدەن كەيىن، اقش پرەزيدەنتى باستاتقان ءبىر قاتار  ەل باسشىلارىنىڭ ايىپتاۋىنا سەبەپ بولدى. سونىمەن قاتار، الەم ەلدەرىنىڭ نارازىلىعى مەن كۇمانىن تۋدىردى. اقش پرەزيدەنتى دونالد ترامپ تا بۇل ىستە الدامشى ارەكەتتەردىڭ بار بولۋى مۇمكىن ەكەنىن ايتقان بولاتىن.

حاشوگگيدىڭ ستامبۋلداعى ساۋد كونسۋلدىعىنا كىرگەن ءساتى. فوتو: انادولى7

ساۋد ارابياسىنىڭ ءسىم باسشىسى بولسا، نە ءىس بولعانى تۋرالى انىق مالىمەتكە يە ەكەندىكتەرىن، ىسكە قاتىسى بار كىنالىلەردى قاتاڭ جازالاۋعا ساۋد بيلىگىنىڭ ۋادە بەرگەنىن العا تارتتى. جۇما كۇنگى حاباردا، وسى ماسەلەگە بايلانىستى پاتشا سالمان ءاس-ساۋد ەكى بىردەي جوعارى لاۋازىمدى تۇلعانى جۇمىستان شىعارعانىن، ىسكە قاتىسى بار دەلىنگەن 18 اگەنتتىڭ قاماۋعا الىنعانى ايتىلعان.

“The Qazaq Times”