فوتو: "نەمىس تولقىنى" اقپارات اگەنتتىگى.

فرانتسيا تىنىق مۇحيتىندا يادرولىق سىناق وتكىزگەنى ءۇشىن حالىقارالىق سوتقا تارتىلدى.

تىنىق مۇحيتىندا ورنالاسقان فرانتسيا پولينەزياسى رەسمي ءپاريجدى 1960-1996 جىلدار ارالىعىندا تىنىق مۇيتى اۋماعىندا 190-نان استام يادرولىق سىناق وتكىزگەنى ءۇشىن گااگا حالىقارالىق سوتىنا بەردى. فرانتسيا پولينەزياسىنىڭ ەكس-پرەزيدەنتى وسكار تەمارۋدىڭ سوزىنشە، فرانتسيانىڭ وتكەن عاسىردا تىنىق مۇحيتى اۋماعىندا جاساعان يادرولىق سىناقتارى ادامزات بالاسىنا جاساعان قاستاندىق جانە وتارلاۋدىڭ باستى قوزعاۋشى كۇشى.

1960-1996 جىلدارى ارالىعىندا فرانتسيا سول كەزدەگى وتارى الجير اۋماعىندا 210, فرانتسيا پولينەزياسىنىڭ مۋرۋروا جانە فاناگاتاۋفا ارالدارى اۋماعىندا 193 يادرولىق سىناق وتكىزدى. وسىدان كەيىن جەرگىلىكتى ازاماتتار ونكولوگيالىق اۋرۋلارعا شالدىعىپ، حالىقارالىق ۇيىمدارعا شاعىمداندى. 2001 جىلى يادرولىق سىناقتان زارداپ شەككەندەردەن قۇرالعان تاۋەلسىز ۇيىم يادرولىق سىناقتى وتكىزگەن اسكەريلەردى ايىپتادى. 2010 جىلدىڭ ماۋسىم ايىندا فرانتسيا ۇكىمەتى زارداپ شەككەندەرگە وتەماقى تولەۋ جونىندە قاۋلى شىعاردى.

قازاقستان اۋماعىندا دا كەڭەستەر وداعىنىڭ يادرولىق سىناقتارىنان قالعان جازىلماس جارا بار. سەمەي يادرولىق سىناق الاڭىندا 1949-1989 جىلدارى ارالىعىندا 468-دەن استام سىناق جۇرگىزىلدى. سالدارىنان جۇزدەگەن ادامنىڭ ءومىرى قيىلىپ، مىڭداعان ادامنىڭ تاعدىرى تاس-تالقان بولدى. بىراق وسى ۋاقىتقا دەيىن كەڭەستەر وداعىنىڭ تىكەلەي مۇراگەرى رەسەي قازاق حالقىنان، ۇكىمەتىنەن ءبىر دە ءبىر رەت رەسمي تۇردە كەشىرىم سۇراعان جوق.

"The Qazaq Times"