پەنتاگوننىڭ بۇرىنعى باسشىسى چاك حەيگەل. فوتو: گولوس امەريكي.

اقش-تىڭ بۇرىنعى قورعانىس ءمينيسترى چاك حەيگەل سول ەلدەگى باق-قا بەرگەن سۇحباتىندا، ترامپ ۇكىمەتىنىڭ ءسۇريا مەن يرانعا باعىتتالعان ستراتەگيالارىن سىنعا الدى. بۇل تۋرالى Defense One باسىلىمى جاريالادى.

چاك حەيگەل پىكىرىندە قۇراما شتاتتىڭ سۇرياداعى قارۋلى كۇشتەرى ەلدىڭ جارتىسىندا ءوز باقىلاۋىنا الا الماعانىن اتاپ ءوتتى.  ول جانە قازىرگى اقش ۇكىمەتىنىڭ ءسۇريا جەرىندەگى يران اسكەري مۇمكىندىكتەرىن كۇيرەتۋ جوسپارلارىن سىنعا الىپ: «ونداعى 2 مىڭ اسكەرمەن يران اسكەرلەرىن ءسۇريادان شىعارا المايسىڭ»، – دەدى.

حەيگەل سوزىندە: «سۇرياعا، يرانعا نەمەسە رەسەيلىكتەرگە قانداي دا ءبىر قاۋىپ ءتونىپ تۇرعانى تۋرالى ايتۋدىڭ ءوزى اقىماقتىق. شىن مانىسىندە وڭىردەگى ولاردىڭ مۇمكىندىكتەرى بىزدەن الدە قايدا جوعارى»، – دەگەن پىكىرىن ايتادى.

پەنتاگوننىڭ بۇرىنعى باسشىسى قازىرگى ترامپ ۇكىمەتىنە قۇراما شتاتتىڭ ورتا شىعىس ەلى ەمەس ەكەنىن، يراننىڭ سول وڭىردە ورنالاسقانىن، كوپتەگەن ماسەلەلەردە يراننىڭ مۇمكىندىگى اقش-تان باسىم بولاتىنىن ەسكەرتتى.

“The Qazaq Times”