تۇركيا جاعالاۋىندا بوسقىندار قايىعى سۋعا كەتتى: قازا تاپقاندار بار

تۇركيانىڭ ەدىرنە قالاسىنىڭ جاعالاۋ ماڭىندا ۇرلەنەتىن قايىق سۋعا باتىپ كەتتى. Hurriyet سايتىنىڭ  حابارلاۋىنشا، قايىقتا 12  زاڭسىز بوسقىن بولعان.

گرەكيا شەكاراسىنا وتۋگە تالپىنعان سۇريالىق ون ازامات پەن ولاردىڭ وسى ساپارلارىن ۇيىمداستىرۋشى ەكى تۇرىك مىنگەن قايىق قولايسىز اۋا-رايىنىڭ سالدارىنان اۋدارىلعان. اپاتتى جاعداي جاعالاۋدان 60 شاقىرىم قاشىقتىقتا بولعان. تۇركيا ازاماتتارى مەن سۇريالىق ءۇش ازامات قۇتقارىلعان، تاعى ەكى بوسقىندى ىزدەستىرۋ جۇمىستارى جۇرگىزىلۋدە.  جەرگىلىكتى ورگانداردىڭ حابارلاۋىنشا، قالعان ازاماتتار قازا تاپقان. بۇدان بۇرىن وسى جىلدىڭ جەتى ايى ىشىندە ەۋروپاعا جەتۋگە تالپىنعان 1500-دەن استام بوسقىن جەرورتا تەڭىزىندە قازا تاپقانى تۋرالى حابارلانعان بولاتىن.  سونىمەن قاتار، 2018 جىلدىڭ قاڭتار ايىنان بەرى جەرورتا تەڭىزىن 60 مىڭنان استام بوسقىن كەسىپ وتكەن. رەسمي مالىمەت بويىنشا، يسپانيا ەۋروپانىڭ ەڭ شيەلەنىستى ماسەلەلەرىنىڭ بىرىنە اينالعان بوسقىنداردى قابىلدايتىن باستى نىسان بولىپ وتىر. بيىل ونىڭ پورتتى قالاسى 23,5 مىڭ بوسقىندى قابىلداعان. ال، يتالياعا 18 مىڭ، گرەكياعا 16 مىڭ بوسقىن باس ساۋعالاعان.

“The Qazaq Times”