رەسەيدە زەينەت جاسى ۇلعايتىلدى

رەسەيدە زەينەتكەرلىك جاسىن ۇلعايتۋ تۋرالى زاڭ ءوز كۇشىنە ەندى. ەل ىشىندە ءبىراز ۋاقىت داۋ تۋعىزعان جاڭا رەفورما ەكىنشى وقىلىمدا قابىلدانعان. 

ەڭبەك ءوتىلى بويىنشا ايەلدەرگە 37, ەرلەرگە 45 جاستان زەينەتكە شىعۋ قاراستىرىلسا دا، جاڭا زاڭعا سايكەس ەندى ايەلدەردىڭ زەينەتكە شىعۋ جاسى 60, ال ەرلەردىكى 65 جاسقا ۇلعايادى. اتالعان رەفورما پوليتسيا مەن اسكەريلەرگە، ارنايى قىزمەت وكىلدەرىنە دە ورتاق.

وسىعان دەيىن پۋتين حالىققا جولداعان ۇندەۋىندە مەملەكەتتەگى ينفلياتسيا مەن جۇمىسسىزدىقتىڭ بەلەڭ الۋىنا قاتىستى جاڭا زاڭنىڭ تولىق كۇشىنە ەنبەگەنىن، بىراق زەينەتاقى رەفورماسىن كەيىنگە قالدىرعان جاعدايدا تولەمدەردى يندەكساتسيالاۋعا مۇمكىندىك بولمايتىنىن ايتقان بولاتىن. پىكىر قايشىلىعىنا اكەپ سوققان رەفورمادان سوڭ، جەرگىلىكتى تۇرعىندار جاپپاي ەرەۋىلگە شىققان. حالىق نارازىلىعىنان كەيىن پۋتينگە دەگەن سەنىم ازايسا دا، زاڭ ءبارىبىر جۇزەگە استى.

ەسكە سالا كەتەيىك، 2013 جىلى قازاقستاندا دا ايەلدەردىڭ زەينەت جاسىن 63-كە دەيىن ۇزارتۋ ۇسىنىلدى. سول كەزدەگى ەڭبەك جانە الەۋمەتتى قورعاۋ ءمينيسترى لاۋازىمىن اتقارعان سەرىك ابدەنوۆ «نەلىكتەن ايەلدەر 63 جاستا زەينەتكە شىعۋى ءتيىس؟» دەگەن ساۋالعا ءمۇدىرىپ-كىدىرىپ: «پوتومۋ چتو، پوتومۋ چتو»-دان ارتىق جاۋاپ بەرە العان جوق. جوسپاردىڭ ناقتى سەبەبەىن جەتە تۇسىندىرە الماعان ەكس-مينيستر وتستاۆكاعا كەتسە دە، ءوزى ۇسىنعان زاڭ جوباسىن «سىيعا تارتىپ كەتتى». ياعني 2018 جىلدىڭ 1 قاڭتارىنان باستاپ ايەلدەردىڭ زەينەت جاسى 2027 جىلعا دەيىن جىلىنا 6 ايدان ۇلعايادى. ەگەر ەسەپتەر بولساق، 2027 جىلى زەينەت جاسى 63-كە جەتەدى. دەمەك، بەس جىل بۇرىن ويعا ورالعان «تىڭ جوبا» اقىرىنداپ ورىندالىپ كەلەدى دەگەن ءسوز.

"The Qazaq Times"