فوتو: Tages-Anzeiger

شۆەيتساريا بيلىگى رەسەيدەن ءوز ەلىندە زاڭسىز بارلاۋ وپەراتسيالارىن توقتاتۋدى تالاپ ەتتى. جۇما كۇنى جەرگىلىكتى گازەتتەر كوكتەمدە گااگادا تىڭشىلىق جاسادى دەگەن كۇدىكپەن ەكى رەسەيلىكتىڭ ۇستالعانىن مالىمدەدى.

شۆەيتساريانىڭ سىرتقى ساياسي ۆەدومستۆوسىنىڭ قۇجاتىندا: «سىرتقى ىستەر باسقارماسى رەسەيدى شۆەيتساريا جەرىندەگى نەمەسە وزگە دە نىساندارعا قاتىستى بارلىق زاڭسىز وپەراتسيالاردى دەرەۋ توقتاتۋعا شاقىرادى»، – دەلىنگەن. مالىمدەمەدە اتاپ وتكەندەي، شۆەيتساريالىق ءسىم بيىل رەسەيلىك ەلشى تىڭشىلىق وپەراتسيالار تۋرالى حابارلامالارعا الاڭداۋشىلىق ءبىلدىرۋ ماقساتىندا ءۇش رەت شاقىرعان.

شۆەيتساريالىق «Tages-Anzeiger» گازەتى جانە گوللاندتىق «NRC Handelsblad» اگەنتتىگى ءوز دەرەككوزدەرىنە سىلتەمە جاساي وتىرىپ، ەكى رەسەيلىك ازامات كوكتەمدە گااگادا تىڭشىلىق جاساعانى ءۇشىن تەرگەۋ الىنعانىن ايتتى.

باسىلىمداردىڭ مالىمەتتەرى بويىنشا، رەسەيلىكتەردە زەرتحانانىڭ كومپيۋتەرلىك جەلىسىن بۇزۋعا ارنالعان جابدىقتار بولعان جانە ەكەۋى دە گرۋ قىزمەتكەرلەرى.

ەۋروپالىق باق-تىڭ اقپاراتى بويىنشا، سكريپال ءىسى بويىنشا ماتەريالداردى زەرتتەگەن شۆەيتساريالىق زەرتحاناعا تىڭشىلىق ارەكەت جاساعان رەسەيلىكتەر بىرنەشە ەۋروپالىق ەلدەردىڭ بىرلەسكەن وپەراتسياسى ناتيجەسىندە ۇستالدى.

بەرندەگى پروكۋراتۋرا ەكى رەسەيلىك ادامعا قاتىستى قىلمىستىق ءىس 2017 جىلدىڭ ناۋرىز ايىندا جۇرگىزىلگەنىن حابارلايدى. ولاردىڭ ەسىمدەرى اتالماعان.

اتالعان ماسەلە بويىنشا، جەكسەنبى كۇنى شۆەيتساريالىق «Sonntags Zeitung» گازەتى قاۋىپسىزدىك جونىندەگى جەرگىلىكتى اگەنتتىكتەردىڭ ءبىرىنىڭ باعالاۋى بويىنشا شۆەيتسارياداعى ءاربىر ءتورتىنشى رەسەيلىك ديپلومات ەلگە ارنايى تاپسىرمامەن كەلىپ، استىرتىن ارەكەتتەردى جۇزەگە اسىرادى. سول ۇشىنە رەسەي الداعى ۋاقىتتا ءوز ىستەرىنە جاۋاپ بەرۋى ءتيىس. بىراق، شۆەيتسارياداعى رەسەي ەلشىلىگى بۇل ايىپتى نەگىزسىز دەپ تانىدى.

ۇلىبريتانيا جانە اقش-پەن اراداعى كەلىسپەۋشىلىكتى رەتتەۋگە تىرىسىپ باققان رەسەي ۇكىمەتى ەندى شۆەيتساريا تاراپىنان ايتىلعان شەشىمگە كوز جۇمىپ قاراۋى ەكىتالاي.

"The Qazaq Times"