قالمۇحانبەت قاسىموۆ: پرەزيدەنت قالاي شەشەدى، ءبىز سوعان كونەمىز

ىشكى ىستەر ءمينيسترى قالمۇحانبەت قاسىموۆ ءوزىنىڭ وتستاۆكاعا كەتۋى، كەتپەۋىنە بايلانىستى پىكىر ءبىلدىردى.

بۇگىن استانا قالاسىندا ءىىم قالمۇحانبەت قاسىموۆتىڭ قاتىسۋىمەن ءباسپاسوز ءماسليحاتى ءوتتى. ءباسپاسوز ءماسليحاتىندا جۋرناليستەردىڭ ءبىرى وعان: «دەنيس تەننىڭ قازاسىنان كەيىن كوپتەگەن بەلسەندىلەر ءسىزدىڭ وتستاۆكاعا كەتۋىڭىزدى تالاپ ەتتى. ءسىز وتستاۆكاعا كەتەسىز بە، جوق پا؟» دەپ سۇراق قويدى. ءوز كەزەگىندە اتى شۋلى مينيسترلىكتىڭ باسشىسى: «وتستاۆكا بويىنشا، ءبىز اسكەري ادامبىز، ۇكىمەت پەن پرەزيدەنت قالاي شەشەدى، ءبىز سوعان كونەمىز» - دەپ جاۋاپ بەردى.

ەستەرىڭىزگە سالايىق، تامىز ايىنىڭ 19-ى كۇنى الماتى قالاسىندا وليمپيادا ويىندارىنىڭ جۇلدەگەرى، مانەرلەپ سىرعاناۋشى دەنيس تەننىڭ ولىمىنەن كەيىن ءىىم ۇلكەن داۋعا ىلىككەن. ازاماتتىق بەلسەندىلەر مەن جۋرناليستەر ىشكى ىستەر ءمينيسترى قالمۇحانبەت قاسىموۆتىڭ وستاۆكاعا كەتۋىن تالاپ ەتىپ، ۆەدومستۆانىڭ وزىنە تۇبەگەيلى رەفورما قاجەت دەگەن. وسىدان كەيىن كوپ ۇزاماي پرەزيدەنت نۇرسۇلتان نازارباەۆ ءىىم مودەرنيزاتسيادان وتكىزۋ قاجەت دەپ، ارنايى قۇجاتقا قول قويعان.

"The Qazaq Times"