ابزال قۇسپان قانداستار ماسەلەسىن «ادىرنا» بىرلەستىگىمەن بىرگە قولعا الدى

كەشە، الماتى قالاسىنداعى «تەمۋچين» رەستورانىندا، ازاماتتىق الۋدا ءتۇرلى قيىنشىلىقتارعا تاپ بولعان قانداستاردىڭ زاڭگەر ابزال قۇسپانمەن كەزدەسۋى ءوتتى. قۇقىقتىق كەڭەس بەرۋ، قانداستاردىڭ ازاماتتىق الۋىنا كەدەرگى بولاتىن ماسەلەلەردى تالقىلاۋ ىسپەتتى بۇنداي شارا بۇعان دەيىن دە «ادىرنا» بىرلەستىگى مەن «كەش» قۇقىق قورعاۋ ورتالىعى بىرلەسە ۇيىمداستىرعان. سونىمەن قاتار  الماتى قالالىق اكىمشىلىگى ىشكى ساياسات باسقارماسىنىڭ تىكەلەي قولداۋىمەن قولعا الىنعان «وتان وتتان دا ىستىق» اتتى جوباسى اياسىندا ءوتىپ كەلە جاتقانىن ايتا كەتكەن ءجون.

ابزال قۇسپان: ماسەلەنى شەشۋدىڭ جولدارىن تاپقانداي بولدىق.

كەزدەسۋدىڭ العاشقى ءسوز تىزگىنىن العان ابزال قۇسپان قانداستاردىڭ ازاماتتىق الۋىنا كەدەرگى بولىپ وتىرعان بىرنەشە ماسەلەنى سانامالاپ ايتىپ ءوتتى. بۇرىن دا ايتىلىپ كەلگەن بۇل ماسەلەلەر كوبىرەك ورىن الاتىن «ءتورت ليدەر» رەتىندە الماتى قالاسى، الماتى وبىلىسى، شقو جانە وقو. ا. قۇسپاننىڭ ايتۋىنشا، وسى اتالعان وبلىس، قالالاردىڭ جەرگىلىكتى كوشى-قون قىزمەتى قۇجات تاپسىرۋشى قانداستاردان اقشا الىپ، ءوز پايداسىنا شەشۋ ءۇشىن قۇجاتتىق ماسەلەلەردى ماقساتتى تۇردە قيىنداتىپ وتىرعان جاعدايلار دا بار.

ول سوزىندە: «ماقساتىمىز بىرەۋلەردى ۇستاپ سوتتاتىپ جىبەرۋ ەمەس، كەشەندى ماسەلەنى شەشۋدىڭ ناقتى جولدارىن تابۋ. ونىڭ جولىن تاپقانداي دا بولدىق. بۇل ماسەلە تۋرالى الەۋمەتتىك جەلى مەن باق-تا كوتەردىك، مەن ەندى اتى-ءجونىن ايتپاي-اق قويايىن، استانادا جوعارى لاۋازىمدى باسشىلار مەنى قابىلدادى. كوشى-قون پوليتسياسىنا قاتىستى قۇزىرلى ورىننان، باس پروكۋراتۋرادان جانە سىرتقى ىستەر مينيسترلىگىنەن. ۇكىمەت بۇل ماسەلەنى شەشۋگە مۇددەلى. ولار وسى تۋرالى قوعامدىق بىرلەستىكتەرىڭىز بولسا، سولار ارقىلى اۋقىمدى تۇردە ورتاعا سالىپ شەشسەك دەپ وتىر. سوندىقتان مەن «ادىرنا» بىرلەستىگىمەن جۇمىس ىستەيمىن دەپ شەشىتىم»، – دەدى.

زاڭگەر قوعامدىق بىرلەستىككە ناقتى ۇسىنىستارمەن كەلگەنىن ايتتى. فوتو: QT.

زاڭگەر جاعىنان قوعامدىق بىرلەستىككە ناقتى ۇسىنىس

ول سونىمەن بىرگە جەكەلەگەن ازاماتتارعا جانە «ادىرنا» قوعامدىق بىرلەستىگىنە ماسەلەنى شەشۋدەگى ءوزىنىڭ ناقتى مىناداي ۇسىنىستارمەن كەلگەنىن ايتتى:

1. ءار اپتا سايىن تۇراقتى ءبىر كۇندى قابىلداۋ كۇنى ەتىپ بەلگىلەپ، جەكەلەگەن ازاماتتاردىڭ ارىز-شاعىمدارىن قابىلداۋ جانە ولارعا قۇقىقتىق كەڭەس بەرۋ.
2. كەمىندە ەكى اپتادا ءبىر رەت قانداستاردىڭ شوعىرلى ورنالاسقان وڭىرلەردە جوعارىداعىداي كەزدەسۋ ۇيىمداستىرۋ.
3. قانداستاردىڭ ارىز-شاعىمى نەگىزىندە جوعارى بيلىككە ورتاق ارىز جولداۋ (سەبەبى، قۇزىرلى ورىندار ءۇشىن جەكەلەگەن ارىزداردىڭ ارقايسىسىمەن جۇمىس جاساۋ قيىندىق تۋعىزادى. سوندىقتان، ۇقساس ماسەلەگە تاپ بولعان ازاماتتاردىڭ اتى-ءجونى كىرىستىرىلىپ، ونىڭ ناقتى قانداي قۇزىرلى ورىننىڭ شەشىمى كەرەك ەكەنىن انىق كورسەتىن قوعامدىق بىرلەستىك اتىنداعى ارىز جازىلۋ ءتيىمدى).
4. حالىققا قىزمەت كورسەتۋ ورتالىقتارىنداعى ءبىر تەرەزەلىك جۇيەنى كوشى-قون باسقارمالارىنا دا ەنگىزۋ تۋرالى ۇسىنىس جولداۋ.

كەزدەسۋ بارىسىندا بەلگىلى بولعانداي، اتامەكەنگە كەلگەننەن كەيىن دە قۇجات ماسەلەسىن شەشە الماي قينالىپ وتىرعان قانداستاردىڭ جالپى سانى 50 مىڭ شاماسىندا. زاڭگەرلەر تارابىنىڭ پىكىرىنشە، ۇكىمەت ءۇشىن 50 مىڭ ادامنىڭ ماسەلەسىن شەشۋ قيىن شارۋا ەمەس، تەك دۇرىس جولمەن جەتكىزىلمەي وتىر. ولار جانە زاڭعا دا ءتيىمدى وزگەرىستەردىڭ ەنگىزىلگەنىن دە ايتىپ ءوتتى. بۇعان دەيىن ءدۇدامال بولعان ماسەلەلەر جاقىندا پارلامەنتتە تاعى قارالماق.

زاڭگەر ابزال قۇسپاننىڭ پىكىرىنشە، ماسەلەنىڭ بۇعان دەيىن شەشىلمەي، كۇردەلىلەنىپ كەتۋى ساۋاتتى دەڭگەيدە مينيسترلىكتىڭ الدىنا اپارىپ قوياتىن ادامداردىڭ جوقتىعىنان بولعان. ال، استاناداعى وتىرعان باسشىلىق بۇنى شەشۋگە مۇددەلى، ولاردىڭ دا ايعاي شۋدان قۇتىلعىسى كەلەدى، بىراق، جەرگىلىكتى جەردە سىبايلاس جەمقورلىقتىڭ بەلگىلەرى بار. مينيسترلىكتەگى باسشىلاردىڭ قانداستارمەن تىكەلەي بايلانىسىنىڭ جوقتىعى، بۇل ماسەلەنىڭ شەشىمىن قيىنداتقان.

"ادىرنانىڭ" وكىلى، اتالعان جوبا جەتەكشىسى قۇرمەتوللا مۇحاممەدحان بىرلەستىكتىڭ اتقارىپ كەلە جاتقان جۇمىستارىن جانە الداعى قادامدارىن ايتىپ ءوتتى. فوتو: QT.

«ادىرنا» بىرلەستىگى قانداي جۇمىستار اتقارىپ كەلدى؟

«ادىرنا» بىرلەستىگىنىڭ وسىعان دەيىنگى جاساعان جۇمىستارى نەگىزىندە 300-دەن استام ارىز-شاعىم قابىلدانعان.  وندا قانشا ادامنىڭ ىقتيار حات ماسەلەسىمەن، قانشا ادامنىڭ ورالمان كۋالىگىنىڭ مەرزىمىنىڭ وتۋىنە بايلانىستى ماسەلەمەن، قانشا ادامنىڭ ازاماتتىعىنىڭ كەشىگىپ جاتقانى سەكىلدى ناقتى مالىمەتتەرى جيناقتالعان.

قانداستاردىڭ ازاماتتىققا تاپسىرۋىنا كەدەرگىلەر بار دەلىنگەن ەڭبەكشى-قازاق اۋدانى شەلەك اۋىلدىق وكرۋگىنە بارىپ، ونداعى ءبىراز كەلەڭسىزدىكتەرگە كۋا بولعان. وسىنداي كەدەرگىلەرگە بايلانىستى ەسىك قالاسىنان، ۇزىناعاشتان، تالدىقورعان قالاسىنان شاعىمداردىڭ ءتۇسىپ جاتقانى ايتىلدى.

بىرلەستىكتىڭ زاڭگەرى كاميشا حانىم جەرگىلىكتى كوشى-قون باسقارمالارىنىڭ  جۇمىسىن قاداعالاۋ ماقساتىندا توسىن تەكسەرۋ جۇمىستارىن الىپ بارۋدى ۇسىندى. سەبەبى، وسىدان بۇرىن بىرلەستىك وكىلدەرى شەلەك اۋىلدىق وكرۋگىنە بارار كەزدە جەرگىلىكتى اكىمشىلىك تارابى الدىن-الا حابار الىپ قويعاندىقتان، بىرلىستىك وكىلدەرىنىڭ ناقتى جاعدايدى بىلۋىنە كەدەرگى جاساۋعا تىرىسقان.

ازاماتتىق الۋعا تىكەلەي جول كورسەتۋ ماقساتىندا «قانداستار» سايتى (http://qandastar.kz/) دا قۇرىلعان. وندا ءتۇرلى قۇجاتتاردى تولتىرۋدىڭ ناقتى ۇلگىلەرى جانە قۇقىقتىق كەڭەستەردىڭ قامتىلعان.

تۇرعاناي حانىم قاراساي اۋدانىنداعى جاعداي تۋرالى ايتتى. فوتو: QT.

«قاراساي اۋدانىندا دا تىرلىك كۇيىپ تۇر»

كەزدەسۋگە كەلگەن قاراساي اۋدانىنىڭ ازاماتى تۇرعاناي جانداربەكوۆانىڭ ايتۋىنشا، قاراساي اۋدانىندا دا ازاماتتىق الۋعا جانە قۇجاتتاردى راسىمدەۋگە بايلانىستى كەدەرگىلەر وتە كوپ. تۇرعاناي حانىم كەلىنىنىڭ ازاماتتىق الۋ ماسەلەسى بويىنشا 4 جىلدان بەرى ءتۇرلى قيىنشىلىقتارعا تاپ بولىپ كەلگەنىن ايتادى. ونىڭ ايتۋىنشا، قاراساي اۋدانىنا قاراستى كوشى-قون باسقارماسىندا جاعداي تىم كۇردەلى. «مەكەمەنىڭ الدى كۇندە حالىققا تولىپ تۇرادى. تانىسى بار نەمەسە اقشاسى بارلار عانا باستىققا كىرە الادى»، – دەيدى تۇرعاناي حانىم.

قاتىسۋشى تارابىنان ايتىلعان مالىمەت بويىنشا، الداعى ۋاقىتتا، «ادىرنا» بىرلەستىگى قاراساي اۋدانىنداعى ماسەلەنى دە قولعا الاتىن بولدى.

"جەبەۋ" قوعامدىق قورىنىڭ توراعاسى ءومارالى ادىلبەك. فوتو: QT.

«جەبەۋ» قوعامدىق قورى دا سەلبەسە جۇمىس جاساۋعا دايىن»

كەزدەسۋدە «جەبەۋ» قوعامدىق قورىنىڭ توراعاسى ءومارالى ادىلبەك تە بولدى. ول دا ماسەلەنى ورتاق شەشۋگە ات سالىساتىندارىن جەتكىزدى. ايتالىق، «جەبەۋ» قورى جيناقتاعان، ءبىر كەزدەرى قىتايدان سوتتالماعانى تۋرالى انىقتاما الدىرۋ تۋرالى تالاپتىڭ زاڭنان الىنىپ تاستالماي تۇرعان كەزىندە، اتالعان انىقتامانى الا الماي قۇجاتتارىنىڭ ۋاقىتى ءوتىپ كەتكەن 50-گە جۋىق ادامنىڭ ارىز-شاعىمى جيناقتالعان. وسى قاتارلى بىرقاتار ماسەلەلەردى ورتاقلىقتاندىرعان جۇمىس ارقىلى شەشۋگە «جەبەۋ» قورى دا دايىن ەكەنىن، زاڭگەر ابزال قۇسپانمەن بۇل باعىتتا جۇمىس جاسايتىندارىن كوپشىلىك الدىندا ايتتى.

كەزدەسۋگە قاتىسۋشى قانداستاردىڭ پىكىرىن تىڭدادى. فوتو: QT.

«ادىرناعا» سەنبەڭدەر، ولار ماسەلەنى شەشە المايدى»

قىتايدان ورالعان قانداستار ماسەلەسىن جانە قىتايداعى قازاق ماسەلەسىن قولعا العان قوعامدىق ۇيىمدار اراسىندا الەۋمەتتىك جەلى ارقىلى وسىنداي ءسوز تاراتقاندارى دا بولعان. كەشەگى كەزدەسۋگە كەلۋگە تالپىنعان بىرقاتار ادامدارعا بەلگىلى ءبىر قوعامدىق بىرلەستىك وكىلدەرى وسىلاي دەپ ايتىپ، ولاردى كەزدەسۋگە جىبەرمەي قويعان.

«ادىرنا» وكىلدەرى كەزدەسۋ كەزىندە ول بىرلەستىكتىڭ اتىن اشىپ ايتپادى. بىراق، "ادىرنا" وكىلدەرى بۇنداي سوزدەردى وسىعان دەيىن دە قانداستاردىڭ ماسەلەسىمەن اينالىسىپ كەلە جاتقان بەلگىلى قوعامدىق ۇيىم ەكەنىن راستادى.

رەجيسسەر ەركىن راقىشەۆ ءوز پىكىرىمەن ءبولىستى. فوتو: QT.

كەزدەسۋ مارەسى

كەزدەسۋدىڭ قورىتىندىسى رەتىندە، زاڭگەر ابزال قۇسپاننىڭ ۇسىنىسى بويىنشا، «ادىرنا» بىرلەستىگى جانە ابزال مىرزا مەن كاميشا حانىم باستاعان زاڭگەرلەر قىركۇيەكتىڭ 25-27 ارالىعىندا ەڭبەكشىقازاق اۋدانىنىڭ ورتالىعى ەسىك قالاسىنا قىزمەت ساپارىمەن باراتىن بولدى.

تۇرعاناي جانداربەكوۆانىڭ بەرگەن مالىمەتتەرى بويىنشا، قاراساي اۋدانىنا دا وسىنداي قىزمەت ساپارى جاسالادى. ونداعى ناقتى ماسەلەلەر تۋرالى مالىمەتتەر توپتاستىرىلادى.

ارىز-شاعىمدار، جينالعان دەرەكتەر نەگىزىندە ماسەلەنى ورتالىقتاندىرعان جۇمىس كۇيىندە شەشۋگە، ورتاق ارىزداردى استاناداعى جوعارى بيلىككە جەتكىزىلمەك. وسى نەگىزدە جەرگىلىكتى كوشى-قون مەكەمەلەرىنىڭ جۇمىس تارتىبىنە قاداعالاۋدى كۇشەيتۋ تالابى دا قويىلۋى مۇمكىن. ءتىپتى، كەيبىر زاڭدار الداعى ۋاقىتتا پارلامەنتتە قارالادى.

كەزدەسۋ سوڭىندا. فوتو: QT.

«ادىرنا» شەتتەن كەلگەن قانداستارعا ەسكەرتەدى:

• بىرلەستىكتىڭ «وتان وتتان دا ىستىق» جوباسى اياسىندا جۇزەگە اسىرعان، قانداستارعا قۇقىقتىق قىزمەت كورسەتۋگە ارنايى جەدەل جەلى 24 ساعات قوسۋلى. ودان قۇجاتتار تاپسىرۋعا قاتىستى كەز-كەلگەن سۇراققا جاۋاپ الا الاسىزدار!

جەدەل جەلى: 8778 808 77 08

                                   +7 727 983 51 33

• «قانداستار» سايتىنان – ( http://qandastar.kz/ ) اتالعان ماسەلەگە قاتىستى بارلىق ينفورماتسيالاردى الا الاسىز.
• وندا ازاماتتىق الۋ، جۇمىسپەن قامتۋ، ءبىلىم بەرۋ، قۇقىقتىق كومەك كورسەتۋ، ارىز-شاعىمدار مەن قۇجاتتاردى تولتىرۋدىڭ ناقتى ۇلگىلەرى كورسەتىلگەن.

 “The Qazaq Times”