Abzal Qwspan alğaşqı söz tizginin aldı. Foto: QT.

Keşe, Almatı qalasındağı «Temuçin» restoranında, azamattıq aluda türli qiınşılıqtarğa tap bolğan qandastardıñ zañger Abzal Qwspanmen kezdesui ötti. Qwqıqtıq keñes beru, qandastardıñ azamattıq aluına kedergi bolatın mäselelerdi talqılau ispetti bwnday şara bwğan deyin de «Adırna» birlestigi men «KEŞ» qwqıq qorğau ortalığı birlese wyımdastırğan. Sonımen qatar  Almatı qalalıq äkimşiligi İşki sayasat basqarmasınıñ tikeley qoldauımen qolğa alınğan «Otan ottan da ıstıq» attı jobası ayasında ötip kele jatqanın ayta ketken jön.

Abzal Qwspan: Mäseleni şeşudiñ joldarın tapqanday boldıq.

Kezdesudiñ alğaşqı söz tizginin alğan Abzal Qwspan qandastardıñ azamattıq aluına kedergi bolıp otırğan birneşe mäseleni sanamalap aytıp ötti. Bwrın da aytılıp kelgen bwl mäseleler köbirek orın alatın «tört lider» retinde Almatı qalası, Almatı obılısı, ŞQO jäne OQO. A. Qwspannıñ aytuınşa, osı atalğan oblıs, qalalardıñ jergilikti köşi-qon qızmeti qwjat tapsıruşı qandastardan aqşa alıp, öz paydasına şeşu üşin qwjattıq mäselelerdi maqsattı türde qiındatıp otırğan jağdaylar da bar.

Ol sözinde: «Maqsatımız bireulerdi wstap sottatıp jiberu emes, keşendi mäseleni şeşudiñ naqtı joldarın tabu. Onıñ jolın tapqanday da boldıq. Bwl mäsele turalı äleumettik jeli men BAQ-ta köterdik, men endi atı-jönin aytpay-aq qoyayın, Astanada joğarı lauazımdı basşılar meni qabıldadı. Köşi-qon policiyasına qatıstı qwzırlı orınnan, Bas Prokuraturadan jäne Sırtqı ister ministrliginen. Ükimet bwl mäseleni şeşuge müddeli. Olar osı turalı qoğamdıq birlestikteriñiz bolsa, solar arqılı auqımdı türde ortağa salıp şeşsek dep otır. Sondıqtan men «Adırna» birlestigimen jwmıs isteymin dep şeşitim», – dedi.

Zañger qoğamdıq birlestikke naqtı wsınıstarmen kelgenin ayttı. Foto: QT.

Zañger jağınan qoğamdıq birlestikke naqtı wsınıs

Ol sonımen birge jekelegen azamattarğa jäne «Adırna» qoğamdıq birlestigine mäseleni şeşudegi öziniñ naqtı mınaday wsınıstarmen kelgenin ayttı:

  1. Är apta sayın twraqtı bir kündi qabıldau küni etip belgilep, jekelegen azamattardıñ arız-şağımdarın qabıldau jäne olarğa qwqıqtıq keñes beru.
  2. Keminde eki aptada bir ret qandastardıñ şoğırlı ornalasqan öñirlerde joğarıdağıday kezdesu wyımdastıru.
  3. Qandastardıñ arız-şağımı negizinde joğarı bilikke ortaq arız joldau (Sebebi, qwzırlı orındar üşin jekelegen arızdardıñ ärqaysısımen jwmıs jasau qiındıq tuğızadı. Sondıqtan, wqsas mäselege tap bolğan azamattardıñ atı-jöni kiristirilip, onıñ naqtı qanday qwzırlı orınnıñ şeşimi kerek ekenin anıq körsetin qoğamdıq birlestik atındağı arız jazılu tiimdi).
  4. Halıqqa Qızmet Körsetu Ortalıqtarındağı bir terezelik jüyeni Köşi-qon basqarmalarına da engizu turalı wsınıs joldau.

Kezdesu barısında belgili bolğanday, atamekenge kelgennen keyin de qwjat mäselesin şeşe almay qinalıp otırğan qandastardıñ jalpı sanı 50 mıñ şamasında. Zañgerler tarabınıñ pikirinşe, ükimet üşin 50 mıñ adamnıñ mäselesin şeşu qiın şarua emes, tek dwrıs jolmen jetkizilmey otır. Olar jäne zañğa da tiimdi özgeristerdiñ engizilgenin de aytıp ötti. Bwğan deyin düdämal bolğan mäseleler jaqında parlamentte tağı qaralmaq.

Zañger Abzal Qwspannıñ pikirinşe, mäseleniñ bwğan deyin şeşilmey, kürdelilenip ketui sauattı deñgeyde ministrliktiñ aldına aparıp qoyatın adamdardıñ joqtığınan bolğan. Al, Astanadağı otırğan basşılıq bwnı şeşuge müddeli, olardıñ da ayğay şudan qwtılğısı keledi, biraq, jergilikti jerde sıbaylas jemqorlıqtıñ belgileri bar. Ministrliktegi basşılardıñ qandastarmen tikeley baylanısınıñ joqtığı, bwl mäseleniñ şeşimin qiındatqan.

"Adırnanıñ" ökili, atalğan joba jetekşisi Qwrmetolla Mwhammedhan birlestiktiñ atqarıp kele jatqan jwmıstarın jäne aldağı qadamdarın aytıp ötti. Foto: QT.

«Adırna» birlestigi qanday jwmıstar atqarıp keldi?

«Adırna» birlestiginiñ osığan deyingi jasağan jwmıstarı negizinde 300-den astam arız-şağım qabıldanğan.  Onda qanşa adamnıñ ıqtiyar hat mäselesimen, qanşa adamnıñ oralman kuäliginiñ merziminiñ ötuine baylanıstı mäselemen, qanşa adamnıñ azamattığınıñ keşigip jatqanı sekildi naqtı mälimetteri jinaqtalğan.

Qandastardıñ azamattıqqa tapsıruına kedergiler bar delingen Eñbekşi-qazaq audanı Şelek auıldıq okrugine barıp, ondağı biraz keleñsizdikterge kuä bolğan. Osınday kedergilerge baylanıstı Esik qalasınan, Wzınağaştan, Taldıqorğan qalasınan şağımdardıñ tüsip jatqanı aytıldı.

Birlestiktiñ zañgeri Kamişa hanım jergilikti köşi-qon basqarmalarınıñ  jwmısın qadağalau maqsatında tosın tekseru jwmıstarın alıp barudı wsındı. Sebebi, osıdan bwrın birlestik ökilderi Şelek auıldıq okrugine barar kezde jergilikti äkimşilik tarabı aldın-ala habar alıp qoyğandıqtan, birlistik ökilderiniñ naqtı jağdaydı biluine kedergi jasauğa tırısqan.

Azamattıq aluğa tikeley jol körsetu maqsatında «Qandastar» saytı (http://qandastar.kz/) da qwrılğan. Onda türli qwjattardı toltırudıñ naqtı ülgileri jäne qwqıqtıq keñesterdiñ qamtılğan.

Twrğanay hanım Qarasay audanındağı jağday turalı ayttı. Foto: QT.

«Qarasay audanında da tirlik küyip twr»

Kezdesuge kelgen Qarasay audanınıñ azamatı Twrğanay Jandarbekovanıñ aytuınşa, Qarasay audanında da azamattıq aluğa jäne qwjattardı räsimdeuge baylanıstı kedergiler öte köp. Twrğanay hanım kelininiñ azamattıq alu mäselesi boyınşa 4 jıldan beri türli qiınşılıqtarğa tap bolıp kelgenin aytadı. Onıñ aytuınşa, Qarasay audanına qarastı köşi-qon basqarmasında jağday tım kürdeli. «Mekemeniñ aldı künde halıqqa tolıp twradı. Tanısı bar nemese aqşası barlar ğana bastıqqa kire aladı», – deydi Twrğanay hanım.

Qatısuşı tarabınan aytılğan mälimet boyınşa, aldağı uaqıtta, «Adırna» birlestigi Qarasay audanındağı mäseleni de qolğa alatın boldı.

"Jebeu" qoğamdıq qorınıñ törağası Omaräli Ädilbek. Foto: QT.

«Jebeu» qoğamdıq qorı da selbese jwmıs jasauğa dayın»

Kezdesude «Jebeu» qoğamdıq qorınıñ törağası Omaräli Ädilbek te boldı. Ol da mäseleni ortaq şeşuge at salısatındarın jetkizdi. Aytalıq, «Jebeu» qorı jinaqtağan, bir kezderi Qıtaydan sottalmağanı turalı anıqtama aldıru turalı talaptıñ zañnan alınıp tastalmay twrğan kezinde, atalğan anıqtamanı ala almay qwjattarınıñ uaqıtı ötip ketken 50-ge juıq adamnıñ arız-şağımı jinaqtalğan. Osı qatarlı birqatar mäselelerdi ortaqlıqtandırğan jwmıs arqılı şeşuge «Jebeu» qorı da dayın ekenin, zañger Abzal Qwspanmen bwl bağıtta jwmıs jasaytındarın köpşilik aldında ayttı.

Kezdesuge qatısuşı qandastardıñ pikirin tıñdadı. Foto: QT.

«Adırnağa» senbeñder, olar mäseleni şeşe almaydı»

Qıtaydan oralğan qandastar mäselesin jäne Qıtaydağı qazaq mäselesin qolğa alğan qoğamdıq wyımdar arasında äleumettik jeli arqılı osınday söz taratqandarı da bolğan. Keşegi kezdesuge keluge talpınğan birqatar adamdarğa belgili bir qoğamdıq birlestik ökilderi osılay dep aytıp, olardı kezdesuge jibermey qoyğan.

«Adırna» ökilderi kezdesu kezinde ol birlestiktiñ atın aşıp aytpadı. Biraq, "Adırna" ökilderi bwnday sözderdi osığan deyin de qandastardıñ mäselesimen aynalısıp kele jatqan belgili qoğamdıq wyım ekenin rastadı.

Rejisser Erkin Raqışev öz pikirimen bölisti. Foto: QT.

Kezdesu märesi

Kezdesudiñ qorıtındısı retinde, zañger Abzal Qwspannıñ wsınısı boyınşa, «Adırna» birlestigi jäne Abzal mırza men Kamişa hanım bastağan zañgerler qırküyektiñ 25-27 aralığında Eñbekşiqazaq audanınıñ ortalığı Esik qalasına qızmet saparımen baratın boldı.

Twrğanay Jandarbekovanıñ bergen mälimetteri boyınşa, Qarasay audanına da osınday qızmet saparı jasaladı. Ondağı naqtı mäseleler turalı mälimetter toptastırıladı.

Arız-şağımdar, jinalğan derekter negizinde mäseleni ortalıqtandırğan jwmıs küyinde şeşuge, ortaq arızdardı Astanadağı joğarı bilikke jetkizilmek. Osı negizde jergilikti köşi-qon mekemeleriniñ jwmıs tärtibine qadağalaudı küşeytu talabı da qoyıluı mümkin. Tipti, keybir zañdar aldağı uaqıtta Parlamentte qaraladı.

Kezdesu soñında. Foto: QT.

«Adırna» şetten kelgen qandastarğa eskertedi:

  • Birlestiktiñ «Otan ottan da ıstıq» jobası ayasında jüzege asırğan, qandastarğa qwqıqtıq qızmet körsetuge arnayı jedel jeli 24 sağat qosulı. Odan qwjattar tapsıruğa qatıstı kez-kelgen swraqqa jauap ala alasızdar!

Jedel jeli: 8778 808 77 08

                                   +7 727 983 51 33

  • «Qandastar» saytınan – ( http://qandastar.kz/ ) atalğan mäselege qatıstı barlıq informaciyalardı ala alasız.
  • Onda Azamattıq alu, jwmıspen qamtu, bilim beru, qwqıqtıq kömek körsetu, arız-şağımdar men qwjattardı toltırudıñ naqtı ülgileri körsetilgen.

 “The Qazaq Times”