تاجىكستان وپپوزيتسياسى كۇش بىرىكتىردى

تاجىكستان وپپوزيتسياسى ۇلتتىق اليانسقا بىرىكتى – دەپ حابارلايدى احبور اقپارات اگەنتتىگى.

قىركۇيەك ايىنىڭ 9-ى كۇنى ۆارشاۆا قالاسىندا تاجىكستان اۋماعىندا تىيىم سالىنعان يسلامدى جاڭعىرتۋ پارتياسى، رەفورما جانە پروگرەسس قوزعالىسى، ازات ويلى تاجىكستان فورۋمى جانە ورتالىق ازيا ميگرانتتارى اسسوتسياتسياسى كۇش بىرىكتىرىپ، ۇلتتىق اليانس اياسىن جۇمىس ىستەۋگە ۋاعدالاستى. پولشا استاناسىندا وتكەن باس قوسۋدا تاجىكستان وپپوزيتسيالىق كواليتسيا باسشىلارى مۇحيددين كابيري، شاروفيددين گادوەۆ، اليم شەرزامونوۆ، يلحومجون ەكۋبزودا ارنايى دەكلاراتسياعا قول قويدى.

تاجىكستان بيلىگىنەن قىسىم كورىپ، شەتەلگە قونىس اۋدارۋعا ءماجبۇر بولعان وپپوزيتسيالىق توپتاردىڭ كۇش بىرىكتىرۋىنە بايلانىستى كەلىسسوزدەر وسىدان ءبىر جىل بۇرىن باستالعان. جاڭادان قۇرىلعان اليانس  الداعى ۋاقىتتا تاجىكستاندا ءادىل سايلاۋ وتكىزۋگە، ەكونوميكالىق جانە ساياسي رەفورمالار جاساۋعا، ادام قۇقىعى مەن ءسوز بوستاندىعىن ورناتۋعا جۇمىس ىستەمەك.

"The Qazaq Times"