بالتىق بويى ەلدەرى كسرو بەلگىسى بار تاۋارلاردى ساتىپ الۋعا تۇبەگەيلى قارسى

ەستونيا، لاتۆيا، ليتۆا ەلدەرى جاھانداعى ەڭ ءىرى Walmart كاسىپورنىن كسرو-داعى سيمۆولدار بەينەلەنگەن تاۋارلاردى ساتىلىمعا شىعارماۋ تۋرالى ۇسىنىس تاستادى. بۇل تۋرالى بۇگىن Associated Press اگەنتتىگى مالىمدەدى.

ليتۆانىڭ اقش-تاعى ەلشىسى رولانداس كريشيۋناس ءوز سوزىندە: «بالتىق بويى مەملەكەتتەرى 1940 جىلدارى اننەكسيالانىپ، 1991 جىلعا دەيىن كەڭەس وداعىنىڭ قۇرامىندا بولدى. كسرو تۇسىندا نەبىر قورقىنىشتى، سۇراپىل كۇندەر بولدى. ناعىز قاتىگەز كەزەڭ ەدى. سول ۋاقىتتا وراق پەن بالعانى بەتكە ۇستاتقان ادام شوشىرلىق، جانتۇرشىگەرلىك قىلمىستار ورىن الدى. سوۆەت بيلىگىنىڭ قول استىندا جۇزدەگەن مىڭ ليتۆالىقتار اياۋسىز قىرعىنعا ۇشىرادى، جەر اۋدارىلدى، جازىقسىز تۇرمەگە جابىلدى. سوندىقتان دا كەشەگى كەزەڭنىڭ اياۋسىز تۇستارىن كورسەتەتىن، جاپپاي قىرعىندى دارىپتەيتىن كيىم-كەشەكتەر مەن وزگە ونىمدەردى تاراتۋعا تۇبەگەيلى قارسىلىق بىلدىرەمىز»، – دەگەن.

بيىل مامىردا Adidas سپورتتىق كيىمدەر فيرماسى رەسەيدەگى فۋتبولدان الەم چەمپيوناتىنا قاتىستى جاسالىنعان كەڭەستىك تاڭبالارى بار قىزىل فۋتبولكالار مەن باسقا دا تاۋارلاردى ساتىلىمنان الىپ تاستاۋعا كەلىسىم بەرگەن. ال Walmart كومپانياسى ءالى كۇنگە دەيىن وسىنداي تيپتەگى كيىمدەردى شىعارادى. وسى ورايدا لاتۆيا، ليتۆا مەن ەستونيا بيلىگى اتالعان كاسىپورىننىڭ تاۋارلارىن ساتىلىمنان الىپ تاستاۋ كەرەكتىگىن ايتتى. مۇنىمەن قوسا، بالتىق بويى ەلدەرىنىڭ باسشىلارى Walmart كومپانياسىنا «توتاليتارلىق رەجيمنىڭ قۇربانى اتانعان ميلليونداعان ادامدارعا ەشقانداي قۇرمەت كورسەتپەيتىنى وتە وكىنىشتى. سونىمەن قاتار، بۇل كاسىپورىن ادام قۇقىقتارىن اياققا تاپتاپ، دەموكراتيانى جوققا شىعارۋ ارقىلى توتاليتارلىق جۇيە جايلى بارىنشا ناسيحات جۇرگىزىپ وتىرعانىن» ايتىپ، ۇندەۋ جولداعان. كومپانيا وكىلدەرى بۇل ۇسىنىسقا ازىرشە جاۋاپ بەرگەن جوق.

"The Qazaq Times"