رەسەي تۇرعىندارىنىڭ زەينەت جاسى تاعى دا ۇلعايادى. ۇكىمەت جوسپارلاعان جاڭا زاڭ بويىنشا ەرلەر 65 جاستا، ايەلدەر 60 جاستا زەينەتكە شىعۋى ءتيىس. بۇل تۋرالى رەسەي پرەزيدەنتى ۆلاديمير پۋتين تىكەلەي ەفيردە مالىمدەدى.

ەسكى زاڭعا ساي، قازىر رەسەيدە ەرلەر زەينەتكە 60 جاستا، ال ايەلدەر 55 جاستا شىعادى. زاڭ جوباسىنا قاتىستى وزگەرىستەر ءالى دە تۋىنداۋى مۇمكىن. پۋتين زەينەت جاسىنا جاقىنداعان ادامداردىڭ قىزمەتتەن ەرتە بوساتىلۋى مەن كوپ بالالى انالاردىڭ بەلگىلەنگەن جاستان ەرتە شىعۋىنا مۇمكىندىك بەرەتىندەرگە جاۋاپكەرشىلىك ەنگىزۋ كەرەكتىگىن ەسكەرتتى.

حالىققا جولداعان ۇندەۋىندە پۋتين مەملەكەتتەگى ينفلياتسيا مەن جۇمىسسىزدىقتىڭ بەلەڭ الۋىنا قاتىستى جاڭا زاڭنىڭ تولىق كۇشىنە ەنبەگەنىن، بىراق زەينەتاقى رەفورماسىن كەيىنگە قالدىرعان جاعدايدا تولەمدەردى يندەكساتسيالاۋعا مۇمكىندىك بولمايتىنىن ايتتى. سەبەبى، الەم كوز تىككەن فۋتبول چەمپيوناتىنىڭ ارتى رەسەيدەگى قارجىلىق داعدارىسقا اكەلىپ، حالىق نارازىلىعىن تۋعىزدى. دەسەك تە پۋتين ەكونوميكالىق قيىندىقتاردىڭ اناعۇرلىم ازايعانىن تىلگە تيەك ەتتى.

زەينەت جاسىنا قاتىستى جوسپار پىكىر قايشىلىعىنا اكەپ سوققان. رەسەيلىكتەر اتالعان رەفورماعا تۇبەگەيلى قارسىلىق ءبىلدىرىپ وتىر. ال جەرگىلىكتى تەلەارنالار زەينەت جاسىنىڭ تولىققاندى ۇلعايمايتىنىن ايتىپ، حالىقتى سەندىرگەن. وسى ۋاقىتقا دەيىن مەملەكەتتە ورىن العان كەلەڭسىز جاعدايلار مەن ولقىلىققا ۇلاسقان رەفورمالاردىڭ سالدارىنان ۆلاديمير پۋتينگە دەگەن حالىق سەنىمى ازايعان. الەۋمەتتىك زەرتتەۋ ۇيىمدارىنىڭ ايتۋىنشا، جىل سايىن وزگەرىسكە ۇشىرايتىن قۇبىلمالى باستامالاردان كەيىن ءپۋتينننىڭ رەيتينگى الدەقايدا تومەندەپ كەتتى.

ال كورشى ەلدەگى رەفورمانىڭ لەبى «الىستان اربالاۋدى» ءجون سانايتىن قازاقستانعا قانشالىقتى ىقپال ەتەدى؟! ۋاقىت سارالاي جاتار...

"The Qazaq Times"