Resey twrğındarınıñ zeynet jası tağı da wlğayadı. Ükimet josparlağan jaña zañ boyınşa erler 65 jasta, äyelder 60 jasta zeynetke şığuı tiis. Bwl turalı Resey prezidenti Vladimir Putin tikeley efirde mälimdedi.

Eski zañğa say, qazir Reseyde erler zeynetke 60 jasta, al äyelder 55 jasta şığadı. Zañ jobasına qatıstı özgerister äli de tuındauı mümkin. Putin zeynet jasına jaqındağan adamdardıñ qızmetten erte bosatıluı men köp balalı analardıñ belgilengen jastan erte şığuına mümkindik beretinderge jauapkerşilik engizu kerektigin eskertti.

Halıqqa joldağan ündeuinde Putin memlekettegi inflyaciya men jwmıssızdıqtıñ beleñ aluına qatıstı jaña zañnıñ tolıq küşine enbegenin, biraq zeynetaqı reformasın keyinge qaldırğan jağdayda tölemderdi indeksaciyalauğa mümkindik bolmaytının ayttı. Sebebi, älem köz tikken futbol çempionatınıñ artı Reseydegi qarjılıq dağdarısqa äkelip, halıq narazılığın tuğızdı. Desek te Putin ekonomikalıq qiındıqtardıñ anağwrlım azayğanın tilge tiek etti.

Zeynet jasına qatıstı jospar pikir qayşılığına äkep soqqan. Reseylikter atalğan reformağa tübegeyli qarsılıq bildirip otır. Al jergilikti telearnalar zeynet jasınıñ tolıqqandı wlğaymaytının aytıp, halıqtı sendirgen. Osı uaqıtqa deyin memlekette orın alğan keleñsiz jağdaylar men olqılıqqa wlasqan reformalardıñ saldarınan Vladimir Putinge degen halıq senimi azayğan. Äleumettik zertteu wyımdarınıñ aytuınşa, jıl sayın özgeriske wşıraytın qwbılmalı bastamalardan keyin Putinnniñ reytingi äldeqayda tömendep ketti.

Al körşi eldegi reformanıñ lebi «alıstan arbalaudı» jön sanaytın Qazaqstanğa qanşalıqtı ıqpal etedi?! Uaqıt saralay jatar...

"The Qazaq Times"